އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ބަލި ނުވާ ކަމަށާ، އެ ބޭފުޅުންގެ ހިސާބުތައް ދައްކާގޮތުން ރިޔާސީ އިންތިހާބުގެ ދެވަނަ ބުރު އެ ޕާޓީން ކަމަށް ރައީސް ޞާލިހު ގެ ރަނިންމޭޓް މުހައްމަދު އަސްލަމް ވިދާޅުވެއްޖެއެވެ.
އެމްޑީޕީގެ "ދަޑިކޮށި ޖަގަހަ" ގައި ކޯލިޝަން ޕާޓީތަކުގެ ކެމްޕޭން ހަރަކާތްތެރިންނާއެކު ރޭ ބޭއްވި ބައްދަލުވުމުގައި އަސްލަމްގެ ވާހަކަފުޅު ފެއްޓެވީވެސް އެމްޑީޕީ ބަލިވެއްޖެ ކަމަށް ބައެއް ފަރާތްތަކުން ދައްކަމުންދާ ވާހަކަ ތަކަށް ރައްދު ދެއްވަމުންނެވެ.
"އަޅުގަނޑުމެން ބައްޔެއް ނުވޭ، ބަލިވާން ގާތް ވެސް ނުވޭ އަދި. އިރާދަކުރެއްވިއްޔާ ދެން އަޅުގަނޑުމެން ރީތިކޮށް ސާފުކޮށް އަޅުގަނޑުމެން މި ނިންމާލާނީ މޮޅުވެގެން, މޮޅުވާނެ. ހުރިހާ ހިސާބުތަކެއް ދައްކަނީ އެހެން."
މުހައްމަދު އަސްލަމް
މިއާއެކު އަސްލަމް ވިދާޅުވީ، އެ ޕާޓީއަށް ވޯޓު ދޭނެ ކަމަށް ސާފުކޮށް ބުނެފައިވާ 37,000 ވޯޓު ނުލިބިވާ ކަމަށާ އެކަން އެގޮތަށް ދިމާވުމުގައި ކޮންމެ ވެސް ސަބަބެއް ވާ ކަމަށެވެ. އަސްލަމް އެ ވިދާޅުވާ 37,000 ވޯޓަކީ އިންތިޚާބުގައި ވޯޓުލާން ނުނުކުންނަ ބައިލައްކައަށްވުރެ ގިނަ މީހުންގެ ތެރެއިން އެ ޕާޓީއަށް ވޯޓުލާނެ ކަމަށް ބުނެފައިވާ މީހުންނެވެ.
"އަޅުގަނޑުމެންނަށް އޯވަރ ކޮންފިޑެންޓް ވީ. ނުވަތަ އަޅުގަނޑުމެންނަށް އެކަން ނުކުރެވި ދިޔައީ. އެހެންނަމަވެސް އަޅުގަނޑުމެންނަށް އެކަން ކުރެވޭނެ. ކުރާނެ."
މުހައްމަދު އަސްލަމް
މީގެ އިތުރުން ވެސް އަސްލަމް ވަނީ ރާއްޖޭގައި އިންޑިއާ ސިފައިން ތިބުން ދިފާއުކޮށް، އެ ގައުމާއި ގުޅުން ކަނޑާލެވެން ނެތް ކަމަށް ވިދާޅުވެފައެވެ. އަދި މީގެ އިތުރުން ވެސް އޭނާ ވަނީ އިދިކޮޅު ޕީޕީއެމް/ޕީއެންސީގެ ކެންޑިޑޭޓް ޑރ މުހައްމަދު މުއިއްޒަށް ފާޑުވިދާޅުވެ ވާހަކަ ދައްކަވާފަ އެވެ.
Advertisement
This content is created and paid for by advertisers and does not involve Voice Journalists
