ހަރުކަށި ފިކުރާ ގުޅުވައިގެން ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒާއި އެމަނިކުފާނުގެ އަނބިކަނބަލުން ސާޖިދާ މުހައްމަދާއި ގުޅޭގޮތުން އެމްޑީޕީ ރިޔާސީ ކެންޑިޑޭޓް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ކެންޕެއިން ތަރުޖަމާނު މާރިޔާ އަހުމަދު ދީދީ ކޮންމެ ދުވަހަކުހެން ދައްކަވަމުން ދިޔަ ދޮގުވާހަކަތައް ތަކުރާރުވާ ނަމަ އިތުރަށް އެމްޑީޕީގެ ނަތީޖާ ދަށްވާނެ ކަމަށް ކުރީގެ އިސްލާމިކް މިނިސްޓަރު ޑރ މުހައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

އެމްޑީޕީގެ މިފަހަރުގެ ރިޔާސީ އިންތިހާބުގެ މުޅި ކެމްޕެއިން ސްޓްރެޓެޖީ އޮތީ ޑރ. މުއިއްޒު އަށް އެންޓި ކެމްޕެއިން ކުރުމަށްކަން ކަމަށް ގިނަ ބަޔަކު އަންނަނީ ބުނަމުން ނެވެ. 

ޚާއްޞަކޮށް، ރައީސް ޞާލިހު ގެ ކެމްޕެއިން އޭޖެންޓު މާރިޔާ އަހުމަދު ދީދީ ކޮންމެ ދުވަހަކުހެން މީޑިއާތަކާއި ބައްދަލުކުރައްވައި ދައްކަވަނީ ޑރ. މުއިއްޒުގެ ވާހަކަ އެވެ. އެގޮތުން ފުރަތަމަ ދުވަސްކޮޅު މުއިއްޒުއާއި ގުޅުވައި އެކި ކަހަލަ ތުހުމަތުތައް ކުރައްވަމުން ދިޔައިރު، ފަހުން މުޢިއްޒުގެ އަނބިކަނބަލުންނަށް ނިސްބަތް ކުރައްވައިވެސް ދޮގު ތުހުމަތުތައް އައީ ކުރައްވަމުންނެވެ. މީގެ އިތުރުން އެމްޑީޕީން ބޭއްވި މާލޭ ބޮޑު ޖަލްސާގައި ވެސް މާރިޔާ ވަނީ މުޢިއްޒަށް ނިސްބަތްކުރައްވާ އެކި ތުހުމަތުތައް ކުރައްވާފައެވެ. 

އެހެން ކަމުން ރިޔާސީ އިންތިހާބުގައި އެމްޑީޕީގެ ނަތީޖާ ދަށްވި އެއް ސަބަބަކީ އެންޓި-ކެންޕެއިން ކުރުން ކަމަށްވެސް ގިނަ ބަޔަކު އަންނަނީ ބުނަމުންނެވެ. 

އެކަމާއި ގުޅިގެން ޑރ. ޝަހީމް ކުރެއްވި ޓްވީޓެއްގައި ވިދާޅުވީ، ހަރުކަށި ފިކުރާ ގުޅުވައިގެން ޑރ. މުއިއްޒާއި އަނބިކަނބަލުން ސާޖިދާގެ އިންސާނީ ކަރާމަތަށް އުނިކަން ގެނުވައި ސަލާމަތަށް ނުރައްކާވާގޮތައް ކޮންމެ ދުވަހަކުހެން މާރިޔާ ދައްކަމުން ދިޔަ ދޮގުވާހަކަތައް ތަކުރާރުވާ ނަމަ ދެވަނަ ބުރުގައިވެސް އިތުރަށް އެމްޑީޕީގެ ނަތީޖާ ދަށްވާނެ ކަމަށެވެ.