އޭނާ އަކީ ފައިސާއަށް ވިކޭނެ މީހެއް ނޫންކަން އެންމެ ރަނގަޅަށް އެނގިލައްވާނީ ހެންވޭރު ހުޅަނގު ދާއިރާގެ މެންބަރު ހަސަން ލަތީފަށް ކަމަށް ރައްޔިތުންގެ މަޖިލީހުގެ ތޮއްޑޫ ދާއިރާގެ މެންބަރު ހަސަން ޝިޔާން (ގިޓާ) ވިދާޅުވެއްޖެ އެވެ.
މެންބަރު ޝިޔާން މިފަދައިން ވިދާޅުވީ، ޝިޔާން ފައިސާއަށް ލެނބުނަސް، ދަ ޑިމޮކްރެޓްސް ގެ މެންބަރުން ނުލެނބޭނެ ކަމަށް ހަސަން ލަތީފް ވިދާޅުވުމާއި ގުޅިގެން ރައްދު ދެއްވައި ކުރެއްވި ޓްވީޓެއްގައެވެ.
އެގޮތުން ޝިޔާން ވިދާޅުވީ، އެމްޑީޕީ ދޫކުރައްވައި ދަ ޑިމޮކްރެޓްސް އަށް އޭނާ ވަޑައިގެންނެވީ ހުސް އަތާ ކަމަށެވެ. އަދި ޑިމޮކްރެޓްސް ދޫކުރައްވާ އަލުން އެނބުރި އެމްޑީޕީ އަށް ވަޑައިގެންނެވީވެސް ހުސް އަތާ ކަމަށް ޝިޔާން ވިދާޅުވި އެވެ.
"އަޅުގަނޑަކީ ފައިސާއަށް ވިކޭނެ މީހެއް ނޫންކަން އެންމެ ރަނގަޅަށް އެނގިވަޑައިގަންނަވާނެ އެއް ބޭފުޅަކީ ޑިމޮކްރެޓްސް ގެ މުއައްސިސް ހަސަން ލަތީފް" ޝިޔާން ވިދާޅުވި އެވެ.
ބުދަ ދުވަހުގެ ރޭ ސޯސަންމަގުގައި އެމްޑީޕީން ކުރިއަށް ގެންދިޔަ ކަންމަތީ ޖަލްސާގައި ވާހަކަ ދައްކަވަމުން ޝިޔާން ވަނީ އެކި ސަބަބުތަކާއި ހުރެ ސަރުކާރު ހިންގާ މައި ޕާޓީ އެމްޑީޕީއާއި ފެޔަށް ޖެހުނު މެމްބަރުންނަށް ވެސް ޕީޕީއެމްގެ ވެރިކަމަށް ވުރެ ދެން ވެސް ރަނގަޅުވާނީ އެމްޑީޕީގެ ވެރިކަމެއް އޮތުންކަމަށް ވިދާޅުވެ، އެމްޑީޕީ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އަށް ދެވަނަ ދައުރެއް ހޯދުމަށް ވަޑައިގެންނެވުމަށް ޑިމޮކްރެޓްސް އަށް ދައުވަތު ދެއްވާފައެވެ.
އެކަމަށް ރައްދު ދެއްވާ ހަސަން ލަތީފް ވިދާޅުވީ، ގިޓާމެން އެކަހަލަ ވާހަކަތައް ދައްކަވަނީ ރައީސް ސޯލިހުގެ އެދިވަޑައިގަތުމުގެ މަތިން ކަަމަށެވެ.
"ރައީސް ސޯލިހަށް ވެސް އެނގިވަޑައިގަންނަން ވާނެ ގިޓާ މެން ކަހަލަ ބޭފުޅުން ކޮޅަކަށް އެ ދެއްވި އެއްޗެއް ދެއްވައިގެން އެކުދިން ލައްވާ ތިޔަކަހަލަ ވާހަކަތައް ދެއްކުވިޔަސް ޑިމޮކްރެޓްސްގެ މެމްބަރުންނާއި ސަޕޯޓަރުން އެމްޑީޕީއަށް އަދި އެހާ ފަސޭހައިން ނުލެނބެވޭނެ" ހަސަން ވިދާޅުވި އެވެ.
Advertisement
This content is created and paid for by advertisers and does not involve Voice Journalists
