ރިޔާސީ އިންތިހާބުގެ ދެވަނަ ބުރު ކާމިޔާބު ކުރައްވާނީ 5 ލަނޑު 2 ލަނޑުން ކުރި ހޯއްދަވައިގެން ކަމުގައި އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހް ވިދާޅުވެއްޖެއެވެ.
ރިޔާސީ އިންތިހާބުގެ ދެވަނަބުރުގެ ކެމްޕެއިންގައި މިރޭ ސޯސަން ޖަގަހައިގައި ކުރިޔަށްގެންދިޔަ ބައްދަލުވުމުގައި ސަޕޯޓަރުންނާ ބައްދަލުކުރައްވާ ވާހަކަދައްކަވަމުން ރައީސްވަނީ އެމްޑީޕީ އުފެއްދުމުގައި އިސްކޮށް އުޅުނު ފަރާތްތައް އެތަނުން ފެނިގެންދިޔުމަކީ ލިބިވަޑައިގަންނަވާ އުފާފުޅެއްކަމަށް ވިދާޅުވެފައެވެ.
މީގެ އިތުރުން ރައީސް ވިދާޅުވީ، މެޗްގެ ފުރަތަމަ ހާފް ނިމިއްޖެކަމަށާއި ބައެއް ފަހަރު ފުރަތަމަ ހާފުގައި ތިން ލަނޑު އެއް ލަނޑުން، ހަތަރު ލަނޑު އެއް ލަނޑުން ބަލިވެ, އިދިކޮޅު ޓީމު މޮޅުވާކަމަށެވެ. އެގޮތުން މިހާރު އެމްޑީޕީގެ ކޯލިޝަން މިއޮތީ ތިނެއް އެކެއްގެ ތަފާތެއްގައި ކަމަށް ރައީސް ވިދާޅުވިއެވެ.
އެހެންނަމަވެސް ދެވަނަ ހާފުގައި ނިކުމެ މޮޅުވާނެކަމަށާއި ހާފް ޓައިމުގައި ޗޭންޖިންގ ރޫމަށް ވަދެ ކަންކަން ރާވާލާފައިވާކަމަށް ރައީސް ވިދާޅުވިއެވެ.
އިރާދަކުރެއްވިއްޔާ ދެ ވަނަ ހާފްގައި އަޅުގަނޑުމެން ނިކުމެ ނަތީޖާ ހަމަހަމަކޮށް އިތުރު ދެ ލަނޑުޖަހާ ފަސް ލަނޑު ދެލަނޑުން އިރާދަކުރެއްވިއްޔާ މިމެޗް އަޅުގަނޑުމެން ކާމިޔާބުކުރާނަން. ހާފްޓައިމްގައި އަޅުގަނޑުމެން ޗޭންޖިން ރޫމަށް ވަދެ ރާވާލައިފިން. ދެވަނަ ބުރު އަޅުގަނޑުމެން ކުޅޭނެ ގޮތް އިންތިޒާމު ކޮށްލައިފިން. ބައެއް މަގާމުތަކަށް ކުޅޭ މީހުން ބަދަލުވެސް ކޮށްލައިފިން. ބުންވަރު ހުރި މީހުން އަޅުގަނޑުމެން ކުރިޔަށް ނެރެފިން. މިހާރު މިދަނީ އެޓޭކް މޯޑުގައި. އިރާދަކުރެއްވިއްޔާ ގޯލު ދެން ޖަހާނީ. ގޯލަކަށްފަހު ގޯލެއް. ގޯލަކަށްފަހު ގޯލެއް އަޅުގަނޑުމެން ޖަހާނީ.
ރައީސް އިބްރާހިމް މުހައްމަދު ޞާލިހް
މިރޭގެ ޖަލްސާގައި ރައީސް ވަނީ އިދިކޮޅު ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒުގެ ވައުދުތަކަށް ފާޑުވިދާޅުވެ، އެއީ އެއްވެސް ޕްލޭނެއް ރޭވުމެއްނެތި ވަމުންދާ ވައުދުތަކެއްކަމަށާއި މަގްސަދަކީ ރައްޔިތުންނަށް އޮޅުވާލައިގެން އަނެއްކާވެސް އިންތިޚާބު ކާމިޔާބުކޮށް ރާއްޖޭގައި ބިރުވެރިކަމާއި ނާމާންކަން ފެތުރުންކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
