ރިޔާސީ އިންތިޚާބު ކާމިޔާބުކުރުމަށް ކުރާ މަސައްކަތުގައި އެމްޑީއޭ އިން މަޑުޖެހިލީ ހާސްވެގެނެއް ނޫން ކަމަށާއި ރާޒުވާ ކުޅިބައި އަތުރާލަން އެމްޑީޕީ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ވަގުތުކޮޅެއް އެރުވީކަމަށް އެމްޑީއޭގެ ނާއިބު ލީޑަރު އަލީ މައުރޫފް ވިދާޅުވެއްޖެއެވެ.
އޭނާ އެފަދައިން ވިދާޅުވީ ސޯސަން ޖަގަހައިގައި އާއްމުންނާއެކު ރޭ ބޭއްވެވި ބައްދަލުކުރެއްވުމުގައި ވާހަކަފުޅު ދައްކަވަމުންނެވެ.
"އަޅުގަނޑުމެން މި މަޑުޖެހިލީ ހާސްވެގެންނެއް ނޫން އެނގޭތޯ؟ އަޅުގަނޑަށް އެނގިފައިވާ ގޮތުގައި އަޅުގަނޑުމެންގެ އިއްޒަތްތެރި މެންބަރަކީ ރާޒުވާ ކުޅެން ވަރަށް މޮޅު ބޭފުޅެއް. އެހެންވީމާ އެމަނިކުފާނަށް ރާޒުވާ ކުޅިބައި އަތުރާލަން އަޅުގަނޑުމެން މި ވަގުތު ކޮޅެއް ދިނީ. މިހާރު އެމަނިކުފާނު އެ ނުކުންނަވަނީ، ކޯލިޝަންއާއި އެކީގައި ނުކުންނަވަނީ އިރާދަކުރެއްވިޔާ ދެވަނަބުރު ބޮޑުތަނުން ކާމިޔާބު ކުރަން."
އެމްޑީއޭގެ ނާއިބު ލީޑަރު އަލީ މައުރޫފް
މިއާއެކު މައުރޫފް ވިދާޅުވީ އެމްޑީޕީއަކީ ރާއްޖެއަށް ޑިމޮކުރަސީ ގެނެސް، އިންސާނީ ހައްގުތައް ކަށަވަރު ކޮށްދީ، އަމާން ކަމާއި ސުލްހަވެެރިކަން ގެނެސްދިން ޕާޓީ އެއް ކަަމަށާއި، ކުރިއަށް އޮތް ތަނުގައިވެސް ރާއްޖޭގައި ސުލްހަ ގާއިމް ކުރެވޭނީ އެ ޕާޓީ އަށް ކަމާމެދު ޝައްކެއް ނެތް ކަމަށެވެ. އެހެންކަމުން އެމްޑީއޭ އޮތީ "އެމްޑީޕީ އާއެކު ގަދަކޮށް" ކަމަށާ، ދެވަނަ ބުރުގައި ބޮޑުތަނުން އިންތިހާބު ކާމިޔާބު ކުރާނީ އެ ޕާޓީން ކަމަށްވެސް އޭނާ ވިދާޅުވިއެވެ.
މައުރޫފު އިތުރަށް ވިދާޅުވީ، އެމްޑީޕީއާއި އެމްޑީއޭގެ ކޯލިޝަން ނުރޫޅޭ ކަމަށާ، ރައީސް ޞާލިހުއާއި އެމްޑީއޭގެ ލީޑަރު އަހުމަދު ސިޔާމް މުހައްމަދުއާ އޮންނަނީ ވަރަށް ގާތް ގުޅުމެއް ކަަމަށެވެ. އެހެންކަމުން އަތޮޅު ތެރޭގެ ހުރިހާ ރަށެއްގައިވެސް ހުރި ޖަގަހަ ތަކުގެ ކެންޕެއިން ހަރަކާތްތައް ވަރުގަދަ ކުރުމަށް އޭނާ ވަނީ އެދިލައްވާފައެވެ.
މިހާރު އެމްޑީޕީ ފެންނަނީ އެމްޑީޕީގެ އަސްލު ގޮތުގައި ކަމަށާއި އެމްޑީޕީގެ ރޫހުގައި ނުކުމެއްޖެ ނަމަ މި އިންތިޚާބު ކާމިޔާބު ކުރެވޭނެ ކަަމަށް ވެސް މައުރޫފް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
