އިދިކޮޅު ފަރާތްތަކުގެ ކެންޕެއިނަށް ފުލުހުން ހުރަސް އަޅަމުންދިޔައިރު ހިޔުމަން ރައިޓްސް ކޮމިޝަން، އެޗްއާރްސީއެމް ނިދާފައި އޮތުމަށްފަހު، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ އަނބިކަނބަލުން ފަޒުނާ އަހުމަދާ ޖެހުނު ހިސާބުން އެ ކޮމިޝަން ހޭލުމުން، ކޮމިޝަންގެ މިނިވަންކަން އޮތް ހިސާބު ފެންނަ ކަމަށް، ފޮނަދޫ ދާއިރާގެ މެންބަރު މޫސާ ސިރާޖް ވިދާޅުވެއްޖެއެވެ. 

ސިރާޖު މިހެން ވިދާޅުވީ، ރައީސުލްޖުމްހޫރިއްޔާގެ އަނބިކަބަލުން ފަޒްނާ އަޙްމަދު އިއްޔެގެ ވަގުތެއްގައި ކެމްޕެއިން ހަރަކާތެއްގައި ހުޅުމާލެ ފޭސް 2 ސަރަޙައްދުގެ ދޮރުން ދޮރަށް ކުރެއްވި ޒިޔާރަތުގައި އާންމު ފަރާތްތަކުން ކެމްޕެއިނަށް ހުރަސް އެޅި ކަމަށް ބުނެ އެކަން ކުށްވެރިކޮށް މިއަދު އެޗްއާރުސީއެމްއިން ބަޔާން ނެރުމާއި ގުޅިގެން ކުރެއްވި ޓްވީޓެއްގައެވެ. 

އެގޮތުން ސިރާޖު ވިދާޅުވީ، ރިޔާސީ އިންތިހާބުގެ މިކެމްޕޭނު ތެރޭގައި އިދިކޮޅުން ރަށްރަށުގައި ދަމާފައި ހުރި ބެނާތައް ފުލުހުން ނަގައި، ކޯޓު އަމުރެއް ނެތި މީހުންގެ ގޭގެއަށް ވަދެ މީހުންގެ މުދާ އަތުލައި، ހައްޔަރުކޮށް އަނިޔާދިން އިރު އެޗްއާރްސީއެމް އޮތީ ގަދަ ނިދީގައި ކަމަށެވެ.

"(ނަމަވެސް) ފަސްޓްލޭޑީއާ ޖެހުނު ހިސާބުން ހޭލެވުނީމާ އެޗްއާރުސީއެމްގެ މިނިވަންކަން އޮތް ހިސާބު ފެނޭ." ސިރާޖު ވިދާޅުވި އެވެ. 

ސިރާޖު މިހެން ވިދާޅުވެފައިވާއިރު، ރިޔާސީ އިންތިހާބުގެ ކެމްޕެއިންގެ ފުރަތަަމަ ބުރުގައި، އިދިކޮޅުުގެ ފަރާތުން ރަށްރަށުގައި ދަމާފައި ހުރި ބެނާ ތައް ނަގައި، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އެ ރަށްރަށަށް ވަޑައިގެންނެވުމުގެ ކުރިން މީހުން ހައްޔަރުކޮށް، އިހްތިޖާޖު ކުރާ މީހުންނާ ދެކޮޅަށް ހާލަތާއި ނުބައްދަލު ބާރުގެ ބޭނުން ފުލުހުން ކުރުމުން އެކަމާއިމެދު އެޗްއާރްސީއެމް އިން ބަހެއްވެސް ބުނެފައި ނުވާތީ ގިނަ ބަޔަކު އައީ ފާޑުކިޔަމުންނެވެ.