ތިމާ އަނެކާއަށް ކުރި ފުރައްސާރައިގެ ސަބަބުން އެމީހާއަށް ލިބުނު ހިތްދަތިކަމާއި އަނިޔާ މި އިހުސާސްކުރެވެނީ ތިމާއަށްވެސް އެފަދަ ފުރައްސާރައާއި ކުރިމަތިވުމުން ކަމަށް ދީނީ ކަންކަން ފެތުރުމަށް މަސައްކަތް ކުރައްވަމުން ގެންދަވާ އަލީ ރަމީޒު ވިދާޅުވެއްޖެ އެވެ.
އަލީ ރަމީޒު މިފަދައިން ވިދާޅުވެފައި ވަނީ ފަސްޓް ލޭޑި މެޑަމް ފަޒުނާ އަހުމަދު އެކަމަނާގެ ފިރިކަލުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ތާއީދު ހޯއްދެވުމަށް ހުޅުމާލޭ ދެވަނަ ފިޔަވައްސަށް ވަޑައިގަތުމުން "ބާޣީ" އަށް ގޮވާ ފުރައްސާރަކޮށް ނުރައްކަލަށް ހުށައަޅާފައިވާކަމަށް އެކަމަނާ ވިދާޅުވުމުން، މީގެ ކުރިން އެކަމަނާގެ ފަރާތުން މީހުންނަށް އަމާޒުކުރި އެފަދަ އިހާނެތި ބަސްތައް ހަނދާންކޮށް ސޯޝަލް މީޑިއާގައި ހޫނު ބަހުސެއް ފަށާފައިވާ ދަނޑިވަޅެއްގައި ކުރެއްވި ޓްވީޓެއްގަ އެވެ.
މެޑަމް ފަޒްނާއާއި ދިމާލަށް "ބާޣީ" އޭ ގޮވާ އަޑުއުފުލާފައިވަނީ 1988 ވަނަ އަހަރު ފަޒުނާގެ ބައްޕަ ސިއްކަ އަހުމަދު އިސްމާއިލް އަޑީގައި ހުރެގެން ރާއްޖެއަށް ދިން އުދުވާނީ ހަމަލާގައި ޝަހީދުވި 19 ދިވެހިންގެ ތެރޭގައި ހިމެނޭ އަބްދުއްސައްތާރު އާދަމްގެ ދަރިއެކެވެ.
އޭނާ އެފަހުން ކިޔައިދިން ގޮތުގައި ފަޒުނާއާއި ދިމާލަށް "ބާޣީ" އަށް ގޮވުނީ ފަޒުނާ ފެނުމުން އޭނާގެ ލޯ ކުރިމަތީގައި ޝަހީދުކޮށްލި އޭނާގެ ބައްޕަގެ ހަނދާންތައް އާވެ، ބައްޕަ ޝަހީދުކޮށްލި މަންޒަރު ހިތަށް ސިފަވުމުން ޖަޒުބާތުގައި ޖެހިގެންނެވެ.
އެކަމާއި ގުޅިގެން މެޑަމް ފަޒުނާ ފޭސްބުކުގައި ލިޔުއްވި ޕޯސްޓެއްގައި ވަނީ އެކަމަނާއަށް ބަޔަކު ފުރައްސާރަކޮށް، ރިޔާސީ ކެމްޕޭނަށް ނިކުމެވަޑައިގަތުމުން ބިރުދައްކާ ނުރައްކަލަށް ހުށައަޅާފައިވާކަމަށް ތުހުމަތުކޮށްފަ އެވެ.
އެފަހުން ސޯޝަލް މީޑިއާގައި މެޑަމް ފަޒުނާ އެކި ފަރާތްތަކަށް ފުރައްސާރަކޮށް ރައްދުކޮށްފައިވާ ބަސްތަކާއި، ޓްވީޓުތައް ގިނަ ބަޔަކު ހިއްސާކުރަމުންދާއިރު، މެޑަމް ފަޒުނާއާއި އެމްޑީޕީން ކުރި ފުރައްސާރައިގެ ސަބަބުން ހިތްދަތިކަން ތަހަންމަލު ކުރަމުންދާ އެތައް ބަޔަކު ވަނީ އެ މީހުން އިހުސާސްކުރަމުންދާ ކަންކަމުގެ ވާހަކަތައް ވެސް ހިއްސާކުރަން ފައްޓާފައެވެ.
އެކަމާއި ގުޅޭގޮތުން އަލީ ރަމީޒު ވިދާޅުވީ މިފަހަރު ފުރައްސާރަކުރުމުން ލިބޭ ހިތްދަތިކަން އިހުސާސްކުރެވުނީ އެފަދަ ކަމެއް ތަހަންމަލު ކުރަން ޖެހުމުން ކަމަށެވެ.
"އެކިއެކި މީހުންނަށް ފުރައްސާރަކޮށް އުޅޭ ބައެއް މީހުންނަށް، ފުރައްސާރަކުރުމުގައި ހުރި ވޭނާއި ހިތްދަތިކަމާއި އަނިޔާވެރިކަން އިހުސާސް މި ކުރެވެނީ އެހެން ބަޔަކު ތިމާއަށް ފުރައްސާރަކުރީމަ އެވެ"
އަލީ ރަޒީމު
އެކަން ފާހަގަކުރައްވާ އަލީ ރަމީޒު ވަނީ އެއްވެސް މީހަކު އަނެކަކަށް ފުރައްސާރަ ނުކުރުމަށް އިލްތިމާސްކުރައްވާފަ އެވެ.
Advertisement
This content is created and paid for by advertisers and does not involve Voice Journalists
