ރިޔާސީ އިންތިޚާބުގެ ދެވަނަ ބުރު ޔަގީންކޮށްލައިގެން މަޑުން ތިބެވެން ނެތްކަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު މީކާއިލް އަޙްމަދު ނަސީމް ވިދާޅުވެއްޖެ އެވެ.

މީކާއިލް މިފަދައިން ވިދާޅުވެފައި ވަނީ ގުޅިފައިވާ ޕާޓީތަކުން ގަލޮޅުގައި ބޭއްވި ރައީސުލްޖުމްހޫރިއްޔާ އިބްރާހިމް މުޙައްމަދު ޞަލިހުގެ ރިޔާސީ ކެމްޕޭނު ޖަލްސާއެއްގައި ވާހަކަދައްކަވަމުން ނެވެ. 

އެ ޖަލްސާގައި ވާހަކަދައްކަވަމުން މީކާއިލް ވަނީ މި ވެރިކަން ދަމަހައްޓަން ޖެހޭ ބައެއް ސަބަބުތަކަށް އަލިއަޅުވާލައްވާފަ އެވެ. އެގޮތުން އޭނާ ވިދާޅުވީ ރައީސް ޞާލިހުގެ މި ފަސް އަހަރަކީ ރާއްޖޭގައި މާރާމާރީތައް ބޮޑުތަނުން މަދުކުރެވިފައިވާ ފަސް އަހަރުކަމަށް ތަފާސް ހިސާބުތަކުން ދައްކާ ކަމަށެވެ. 

Advertisement

މީގެ ކުރިން އާއިލާތަކުގައި އުފެދިފައިވާ ބިރުވެރިކަމާއި، ޒުވާނުންނަށް އަމާންކަމާއެކު މަގުމަތީގައި އުޅުމުގެ ފުރުސަތު ގެއްލިފައި އޮތް ނަމަވެސް ރައީސް ޞާލިހުގެ ވެރިކަމުގައި އެކަން ޔަގީންކުރެވިފައިވާ ކަމަށާއި، މިއީ ވަރަށް ފުންކޮށް ރައްޔިތުން ވިސްނާލަން ޖެހޭކަމެއްކަމަށް މީކާއިލް ވިދާޅުވި އެވެ. 

އޭގެ އިތުރުން މީކާއިލް ވިދާޅުވީ މިހާރު މިއޮތީ ދެ ސިޔާސީ ޕާޓީގެ ދެމެދުގައި އޮތް ފިކުރުގެ ތެރެއިން ވަކި ފިކުރެއް އިޚްތިޔާރުކުރުމަށް ވުރެ ބޮޑު ނިންމުމެއް ނިންމަން ޖެހިފައި ކަމަށެވެ. އެގޮތުން 30 ސެޕްޓެމްބަރު ވަނަ ދުވަހު ރައްޔިތުންނަށް ނިންމަން ޖެހިފައި އޮތީ މާޒީއަށް ދާނީ ތޯ ނޫނީ އަމާން ރާއްޖެއެއްގައި ކުރިއަށް ދާނީ ތޯ ނިންމާ ނިންމުންކަމަށެވެ. 

ޔަގީނުންވެސް މާޒީގައި ކުރިމަތިވި ފަދަ އަނިޔާތަކާއި ކުރިމަތިލުމަކީ ރައްޔިތުން ބޭނުންނުވާނެ ކަމެއްކަން ފާހަގަކުރައްވާ މީކާއިލް ވިދާޅުވީ އެއާއެކުވެސް ދެވަނަ ބުރު ޔަގީންކޮށްލައިގެން ތިބެގެން ނުވާނެ ކަމަށެވެ. އަދި އެމްޑީޕީގެ ހުރިހާ މެމްބަރުން އެދުވަހު ވަގުތު ހުސްކޮށްގެން ވޯޓުލުމަށް މީކާއިލް ވަނީ ގޮވާލައްވާފަ އެވެ. 

މީކާއިލް ވިދާޅުވީ 30 ސެޕްޓެމްބަރުގައި ރައްޔިތުން ވޯޓުލާއިރު، މި ފަސްއަހަރު ރައްޔިތުންނަށް ލިބުނު ހިތްފަސޭހަ ދިރިއުޅުން ހަނދުމައިގައި ބަހައްޓާނެކަމުގެ ޔަގީންކަން އޮތް ކަމަށެވެ. އަދި ދިވެހިން އެދޭ ވެރިކަން ކޮށްދެއްވާނެ ބޭފުޅަކީ ރައީސް ޞާލިހު ކަމާއި މެދު ޝައްކު ނުކުރައްވާކަމަށް މީކާއިލް ވިދާޅުވި އެވެ.