ރިޔާސީ އިންތިޚާބުގެ ދެވަނަ ބުރު ބޮޑު ތަފާތަކުން ކާމިޔާބުކުރައްވާނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ. 

އެމަނިކުފާނު މިފަދައިން ވިދާޅުވެފައި ވަނީ ގަލޮޅުގައި ބޭއްވި އެމަނިކުފާނުގެ ކެމްޕޭނު ޖަލްސާއެއްގައި ވާހަކަދައްކަވަމުން ނެވެ. 

ރައީސް ޞާލިހު ވިދާޅުވީ ރިޔާސީ އިންތިޚާބު އެއްބުރުން ކާމިޔާބު ކުރެވޭނެކަމަށް ވިދާޅުވީ އެކަން ކުރެވޭނެކަމުގެ ވަރަށް ބޮޑު ޔަގީންކަމެއް އޮތުމުން ކަމަށެވެ. އެހެން ނަމަވެސް އިންތިޚާބު އެއްބުރުން ކާމިޔާބުވިޔަ ނުދިނުމަށް އޭރުވެސް ބަޔަކު މަސައްކަތް ކުރަމުންދިޔަ ކަމަށާއި، އެއްބުރުން އިންތިޚާބު ނުނިމުނީ އެމީހުން ކުރި މަސައްކަތުގެ ސަބަބުން ގިނަ ވޯޓުތަކެއް ބެހިގެން ދިއުމުން ކަމަށް ރައީސް ޞާލިހު ވިދާޅުވި އެވެ. 

ރައީސް ޞާލިހު ގަލޮޅު ކެމްޕޭނު ޖަލްސާގެ ތެރެއިން

އެއާއެކު ރައީސް ޞާލިހު ވިދާޅުވީ ފުރަތަމަ ބުރު ކާމިޔާބު ނުވި ނަމަވެސް، އޭރުވެސް ދެވަނަ ބުރަކަށް ދާން ޖެހިދާނެކަން ވިސްނައިގެން އެކަމަށް ތައްޔާރުވެ ތިއްބެވިކަމަށެވެ. 

ފުރަތަމަ ބުރަށްފަހު، ލިބުނު ތަޖުރިބާތަކާއެކު މިހާރު ދެވަނަ ބުރަށް ވާންޖެހޭ ތައްޔާރީތައް މިހާރު ފުރިހަމަވެފައިވާ ކަމަށެވެ.

އެމަނިކުފާނު އަރިހުގައި ރިޔާސީ އިންތިޚާބު ކާމިޔާބު ކުރުމަށް ކުރަން ޖެހޭ ކަންކަން ވިދާޅުވެދެއްވާނެ މޮޅެތި ބޭފުޅުން ތިއްބެވި ކަމަށާއި، އެބޭފުޅުންނާއި އެކު ރިޔާސީ އިންތިޚާބުގެ ދެވަނަ ބުރު ތަފާތު ބޮޑުކޮށް ކާމިޔާބު ކުރައްވާނެ ކަމުގެ ޔަގީންކަން އޮތްކަމަށް ރައީސް ޞާލިހު ވިދާޅުވި އެވެ. 

ރައީސް ޞާލިހުގެ އަރިހުގައި މަޖިލީހުގެ ބިލެއްދޫ ދާއިރާގެ މެމްބަރު ހަލީމު ހުންނަވައިނިކޮށް

ރިޔާސީ އިންތިޚާބުގެ ފުރަތަމަ ބުރުގެ ނަތީޖާއަށްފަހު އެންމެ ފުރަތަމަ ނޫސްވެރިންނާއި ބައްދަލުކުރައްވާ ވާހަކަދައްކަވަމުން ރައީސް ޞާލިހު ވިދާޅުވީ އިންތިޚާބުގެ ދެވަނަ ބުރު ކާމިޔާބުކުރުމަށް ދެތިން ބަޔަކާއި ގުޅެން ޖެހޭނެކަމަށް ފެނިވަޑައިގަންނަވާ ކަމަށެވެ. 

އެގޮތުން އެމަނިކުފާނު ވަނީ ޖުމްހޫރީ ޕާޓީ އަދި ދަ ޑިމޮކްރެޓްސްއާއި އެކު ކޯލިޝަން އެއްބަސްވުމަށް އާދެވޭތޯ ގިނަ މަސައްކަތްޕުޅުތަކެއް ވެސް ކުރައްވާފަ އެވެ. އެހެން ނަމަވެސް މިހާރު އެމަނިކުފާނުގެ ފަހަތްޕުޅުގައި ތިބި ސިޔާސީ ޕާޓީތައް ފިޔަވައި އިތުރު ބަޔަކު ދެވަނަ ބުރަށް ރައީސް ޞާލިހު ފަހަތްޕުޅަށް އަރާވަޑައިގެންފައެއް ނުވެއެވެ. 

އެހެން ނަމަވެސް އެމަނިކުފާނު ވިދާޅުވަނީ ދެވަނަ ހާފަށް ހުންނެވީ ތައްޔާރަށް ކަމަށެވެ. އަދި ދެވަނަ ހާފުގައި ކުޅެ ތަފާތު ބޮޑުކޮށް ކާމިޔާބު ހޯއްދަވާނެކަމުގެ ޔަގީންކަން ވެސް އޮތްކަމަށެވެ.