އަދާލަތު ޕާޓީގެ ރައީސް އަދި ހޯމް މިނިސްޓަރު އިމްރާން އަބްދުالله ހުންނަވަނިކޮށް އެހެން ބަޔަކަށް ދީނީ ކާޑު ނުކުޅެވޭނެކަމަށް ޝެއިޚް އިލިޔާސް ޖަމާލު ވިދާޅުވެއްޖެ އެވެ.
ޝެއިޚް މިފަދައިން ވިދާޅުވެފައި ވަނީ ގުޅިފައިވާ ސިޔާސީ ޕާޓީތަކުން ރޭ ގަލޮޅުގައި ބޭއްވި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ރިޔާސީ ކެމްޕޭނު ޖަލްސާއެއްގައި ވާހަކަދައްކަވަމުން ނެވެ.
ޝެއިޚްގެ ވާހަކަ ފައްޓަވަމުން ވަނީ އިސްލާމްދީނާއި ގައުމިއްޔަތާއި ގުޅުވާ ރީތި ޅެމެއް އިދިކޮޅުގެ ފަރާތްތަކަށް ވިދާޅުވެދެއްވާފައެވެ. އެއާއެކު ޝެއިޚް ވިދާޅުވީ އިދިކޮޅުގެ ފަރާތްތަކުން ލާދީނީ ނަންބޭނުންކޮށްގެން "ދީނީ ކާޑު" ކުޅުމަށް މަސައްކަތް ކުރަމުންދާ ކަމަށެވެ.
ދީނީ ކާޑަކީ ރައީސް މުހައްމަދު ނަޝީދުގެ ވެރިކަމުގައި ހިނގަމުންދިޔަ ކަންކަމާއި ދެކޮޅަށް އަދާލަތު ޕާޓީން އޭރުގެ ޝެއިޚް އަދި މިހާރު ހޯމް މިނިސްޓަރުގެ ގޮތުގައި ހުންނެވި އިމްރާން އަބްދުالله ބޭނުންކުރައްވަމުން ދިޔަ އެއްޗެއް ކަމަށާއި، އޭރު އެފަދައިން އެވާހަކަތައް ދެއްކެވީ ކީރިތި ރަސޫލާގެ ސުންނަތް ނޫން އެހެން ގޮތެއް ހޯދަން ޖެހޭކަމަށް ވިދާޅުވެ ވެރިން ދައްކަވަމުން ދިޔަ ވާހަކަތަކުގެ ސަބަބުންކަމަށް ޝެއިޚް އިލިޔާސް ޖަމާލު ފާހަގަކުރެއްވި އެވެ.
އެއާއެކު ޝެއިޚް ވިދާޅުވީ މިހާރު އެ ހާލަތު ނެތްކަމަށާއި، ދީނީ ކާޑު އެހެން ބަޔަކަށް ނުކުޅެވޭނެ ކަމަށެވެ.
ޝެއިޚް އިލިޔާސް ޖަމާލު ރައީސް ޞާލިހު ކެމްޕޭނު ޖަލްސާއެއްގައި ވާހަކަދައްކަވަނީ
"މިބޭފުޅުން ވަރަށް ރޭވި ދީނީ ކާޑު ކުޅެން، ނުކުޅެވޭނެ! ލާދީނީ ކާޑު ކުޅެން.. ނުކުޅެވޭނެ! ކީއްވެގެންތޯ؟ އެ ކާޑު މީގެކުރިން މި ގައުމުގައި ކުޅުއްވީ އަދާލަތު ޕާޓީން. ޝެއިޚް އިމްރާނު އެ ހުންނެވީ.. ދެން ކިހެންތޯ ކުޅޭނީ އެ ކާޑު"
ޝެއިޚް އިލިޔާސް ޖަމާލު
އެކަން ފާހަގަކުރައްވާ ޝެއިޚް އިލިޔާސް ޖަމާލު ވަނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ވަރަށް ބޮޑަށް ހުޝާމަދުކުރައްވާފަ އެވެ.
ޝެއިޚް ވިދާޅުވީ ރައީސް ޞާލިހަކީ ވަރަށް ހެޔޮލަފާ ޞާލިހު އަދި ދީނަށް ލޯބިކުރައްވާ ބޭފުޅެއްކަމަށެވެ. އެމަނިކުފާނު ފަދަ އަޚުލާގު ދަރިއަކު ނެތްކަމަށާއި، އެމަނިކުފާނާއި ދެކޮޅަށް އެއްވެސް ބާވަތެއްގެ ދީނީ ކާޑު ކުޅެވެން ނޯންނާނެކަމަށް ޝެއިޚް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
