ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ދުނިޔޭގެ ރައީސްކަމަށް ކުރިމަތިލެއްވުމަށް ޔޫތު މިނިސްޓަރު އަހުމަދު ގޮވާލައްވައިފި އެވެ. 

މިނިސްޓަރު މަހުލޫފު މިފަދައިން ގޮވާލައްވާފައިވަނީ ގަލޮޅުގައި ބޭއްވި ރައީސް ޞާލިހުގެ ރިޔާސީ ކެމްޕޭނު ކަންމަތީ ޖަލްސާއެއްގައި ވާހަކަދައްކަވަމުން ނެވެ. 

މަހުލޫފު ވިދާޅުވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވައުދުތަކުން ރައްޔިތުންނަށް އެތައް އުންމީދެއް މިހާރުވެސް ގެނެސްދީފައިވާ ކަމަށެވެ.

ޚާއްސަކޮށް އެމަނިކުފާނުގެ ބޯހިޔާވަހިކަމުގެ ސިޔާސަތުގެ ސަބަބުން މާލޭގެ ރައްޔިތުންނަށް އުފާވެރިކަން ގެނެސްދެއްވާފައިވާ ކަމަށާއި، އެމަނިކުފާނު ރައްޔިތުންނާއި ހަމަޔަށް ތިލަކޮށްދެއްވާފައިވާ ކަންކަމަކީ މީގެ އެތައް އަހަރަކު ނުކޮށްދެވިހުރި ކަންތައްތަކެއް ކަމަށެވެ. 

މަހުލޫފުވިދާޅުވީ ރައީސް ޞާލިހު ވަރުގެ ވެރިއެއް މި ޤައުމަށް 500 އަހަރުން ވެސް ނުލިބޭނެކަން ގަބޫލުކުރާ މީހުން އެބަތިބި ކަމަށެވެ. އެމަނިކުފާނުގެ ޤާބިލްކަމަށް ބަލާއިރު ހަގީގަތުގައި ކުރިމަތިލައްވަން ފެނިވަޑައިގަންނަވަނީ ދުނިޔޭގެ ރައީސްކަމަށް ކަމަށް މަހުލޫފު ވިދާޅުވި އެވެ. 

ޔޫތު މިނިސްޓަރު އަހުމަދު މަހުލޫފު ގަލޮޅު ޖަލްސާގައި ވާހަކަދައްކަވަނީ

މަހުލޫފު ވިދާޅުވީ ރިޔާސީ އިންތިޚާބުގެ ދެވަނަ ބުރަށް އެމްޑީޕީ އޮތީ ވަރަށް ބޮޑަށް ތައްޔާރުވެފައި ކަމަށެވެ. މީގެ ކުރިން ޖުމްހޫރީ ޕާޓީއާއި ދަ ޑިމޮކްރެޓްސްއަށް ވޯޓުދެއްވި ފަރާތްތައް ވެސް ރިޔާސީ އިންތިޚާބުގެ ދެވަނަ ބުރުގައި ރައީސް ޞާލިހަށް ތާއީދުދޭން ނިންމަވާފައިވާ ކަމަށާއި، އެމީހުންގެ ބޮޑު އަގުލަބިއްޔަތެއް ރައީސް ޞާލިހަށް ލިބިގެންދާނެކަމަށް މަހުލޫފު ވިދާޅުވި އެވެ. 

އެއާއެކު އޭނާ ވަނީ ރިޔާސީ އިންތިޚާބު ކާމިޔާބުކޮށް ނޮވެމްބަރު 17 ގައި ރާއްޖޭގެ ރައީސުލްޖުމްހޫރިއްޔާކަމަށް ހުވާކުރައްވާނީ ރައީސް ޞާލިހުކަމާއި މެދު ޔަގީންކުރައްވާކަމަށް ވިދާޅުވެފަ އެވެ.