ޑިމޮކްރެޓުންނަކީ ފަޅަކަށް ނަފްސު ވިއްކާލެނެ ބައެއް ނޫން ކަމަށް ވިދާޅުވެ ދަ ޑިމޮކްރެޓްސްގެ އިންޓަރިމް ޗެއާޕާސަން އަދި މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފް, ރައްޔިތުން މަޖިލީހުގެ ބިލަތްދޫ ދާއިރާގެ މެންބަރު އަހްމަދު ހަލީމް (ދޮންބިލެތް) އަށް ބަހުގެ ހަމަލާތަކެއް ރައްދު ކުރައްވައިފިއެވެ.
ރިޔާސީ އިންތިހާބުގެ ދެވަނަބުރުގައި ޑިމޮކްރެޓްސްގެ 99 އިންސައްތަ މެމްބަރުން އަރަމުން ދަނީ އެމްޑީޕީ ކޮޅަށް ކަމަށް ރައްޔިތުން މަޖިލީހުގެ ބިލަތްދޫ ދާއިރާގެ މެންބަރު އަހްމަދު ހަލީމް (ދޮންބިލެތް) ވަނީ ދާދިފަހުން ވިދާޅުވެފައެވެ.
އެވާހަކަތަކަށް ރައްދު ދެއްވައި ހަސަން ވިދާޅުވީ ޑިމޮކްރެޓްސްގެ މެންބަރުންނަކީ ދޮންބިލެތް ފަދައިން ފަޅަކަށް ނަފްސު ވިއްކާލާނެ ބައެއް ނަމަ، އެ ޕާޓީ ނު އުފެދުނީސް ކަމަށެވެ. އަދި މިހާރު ޑިމޮކްރެޓްސް އިން އެމްޑީޕީއާއި ދުރަށް ޖެހިލައިގެން އުޅެނީ ރައީސް ޞާލިހުގެ ސަބަބުން ކަމަށްވެސް އޭނާ ވިދާޅުވި އެވެ.
”ޑިމޮކްރެޓްސްގެ މެންބަރުންނަކީ ތިޔަހެން (ދޮންބިލެތް ހެން) ފަޅަކަށް ނަފްސު ވިއްކާލާ ބައެއް ނަމަ މި ޕާޓީ ނުއުފެއްދުނީސްކަން އަހުމަދަށް އޮޅިވަޑައި ގަތުމަކީ އަޅުގަނޑު ހައިރާންވާނެ ކަމެއްނޫން! ޑިމޮކްރެޓުން އެމްޑީޕީއާއި ދުރަށް ދިޔައީ ރައީސް ޔާމީންގެ ސަބަބަކުން ނޫން. ރައީސް ޞާލިހުގެ ސަބަބުން.“ ހަސަން ވިދާޅުވިއެވެ.
އަހްމަދު ހަލީމް (ދޮންބިލެތް)އަކީ ރައީސް ނަޝީދާއި ވަރަށް އަރިސްކޮށް މަސައްކަތް ކުރެއްވި، އަދި މަޖިލީހުގައި މިސަރުކާރާރަށް ފާޑުވެސް ވިދާޅުވި ބޭފުޅެކެވެ. އަނބިކަނބަލުންނަކީ ޑިމޮކްރެޓްސް އުފެއްދުމަށް ކުރި މަސައްކަތުގައި ވެސް އުޅުއްވި ބޭފުޅެކެވެ. އެމްޑީޕީގެ ރިޔާސީ ޕްރައިމަރީގައިވެސް އޭނާ ނަޝީދާއެކު ހުންނެވިއެވެ.
ނަމަވެސް މިފަހުން އޭނާ ފެނިފައި ވަނީ އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ކެންޕެއިންގެ ތެރެއިންނެވެ.
Advertisement
This content is created and paid for by advertisers and does not involve Voice Journalists
