ރިޔާސީ ކެންޕެއިނަށް ބ އަތޮޅަށް ކުރައްވަމުންދާ ދަތުރުފުޅުގެ ތެރެއިން، ހިތާދޫއަށް ވަޑައިގެންނެވުމުން އެރަށު އެމްޑީޕީ ޖަގަހައިގައި ތިބި އެ ޕާޓީގެ މެންބަރުންނާއި ސަލާމްކުރައްވައި، ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުޢިއްޒު އަނެއްކާވެސް ނަމޫނާ ދައްކަވައިފި އެވެ. 

ރިޔާސީ ކެންޕެއިނަށް ހިތާދޫއަށް މުޢިއްޒަށް ވަޑައިގެންނެވުނީ  މިއަދުގެ ހަވީރުގެ ވަގުތެއްގައެވެ. ވަޑައިގެން އެ ރަށު ރައްޔިތުންނާ ބައްދަލު ކުރައްވަން ވަޑައިގެންނެވި މަގުމަތީގައި، އެމްޑީޕީ ބައެއް ފަރާތްތަކުން ވަނީ އަޑުގަދަ ކޮށް، މުޢިއްޒާއި ދެކޮޅަށް އަޑު އުފުލާފައެވެ. އެއާއެކު މުޢިއްޒު ވަނީ އެކަމުގައި އުޅުނު އެމްޑީޕީގެ އެކްޓިވިސްޓުންނާއި ސަލާމް ކުރައްވައި، އެމީހުން ދެއްކެވި ވާހަކަތައް ވެސް އަޑު އައްސަވާފައެވެ. 

މުޢިއްޒުގެ ފަރާތްޕުޅުން ފެނިލެއްވި އެ އަމަލަށް އެތަނުގައި ތިބި ޕީޕީއެމް/ޕީއެންސީގެ ސަޕޯޓަރުން ވަނީ ވަރަށް ބޮޑަށް ތަޢުރީފްކޮށް ތަރުހީބު ދީފައެވެ. އަދި އެމީހުން ވޯޓުލާނީ ޑރ. މުޢިއްޒުއަށް ކަމަށްވެސް އެމީހުން އައީ ގޮވަމުންނެވެ. 

މީގެ ކުރިންވެސް، ރިޔާސީ އިންތިހާބުގެ ފުރަތަމަ ބުރުގެ ކެންޕެއިންގެ ތެރެއިންވެސް މުޢިއްޒު ވަޑައިގެންނެވުމުން އޭނާއާ ދެކޮޅަށް އަޑުއުފުލި މީހުންގެ އަރިހަށް ވަޑައިގެން ސަލާމް ކުރައްވައި، އެމީހުންގެ ވާހަކަތައް މުޢިއްޒު ވަނީ އައްސަވާފައެވެ. 

އޭގެ ސަބަބުން، އެތަނުގައި އަޑުގަދަ ކުރި މީހުންގެވެސް އަޑު މަޑުވެގެން ދިޔައެވެ. އަދި އެ ވީޑިއޯތައް މީސްމީޑިއާގައި ދައުރުވާން ފެށުމުން ގިނަ ބަޔަކުވެސް ވަނީ މުޢިއްޒަށް ތަޢުރީފް ކުރައްވާފައެވެ.