އަވައްޓެރި އިންޑިއާގެ ދިފާއުގައި ފޮރިން މިނިސްޓަރު އަބްދުالله ޝާހިދު ތެދުވެވަޑައިގެން އިދިކޮޅު ކޯލިޝަނަށް ހޫނު ބަހުގެ ހަމަލާތަކެއް ރައްދުކުރައްވައިފި އެވެ. 

ސަރުކާރު ހިންގާ މައި ޕާޓީ އެމްޑީޕީގެ ރިޔާސީ ކެންޑިޑޭޓު އަދި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ރިޔާސީ ކެމްޕޭނު ޖަލްސާއެއްގައި ވާހަކަދައްކަވަމުން ފޮރިން މިނިސްޓަރު ޝާހިދު ވިދާޅުވީ އިދިކޮޅުން މަސައްކަތް ކުރަނީ ފިތުނަވެރި ވާހަކަތައް ފެތުރުމަށް ކަމަށެވެ. 

އެގޮތުން ރާއްޖޭގައި މިހާރު އޮތް އިންޑިއާގެ ދެ ހެލިކޮޕްޓަރަކީ ރައީސް މުހައްމަދު ނަޝީދުގެ ވެރިކަމުގަޔާއި، ރައީސް ޔާމިނުގެ ވެރިކަމުގައި ގެނައި ހެލިކޮޕްޓަރުތަކެއް ކަމަށް ޝާހިދު ވިދާޅުވި އެވެ. އަދި އެ ދެ ހެލިކޮޕްޓަރަކީ ރައީސް ޞާލިހާއި "ބެހޭ ކަމެއް" ނޫންކަމަށް ޝާހިދު ވިދާޅުވި އެވެ. 

ޝާހިދު ވިދާޅުވީ އިންޑިއާގެ ވާހަކައަކީ އިދިކޮޅުން ސަރުކާރާއި މެދު ނަފްރަތު އުފެއްދުމަށް ދައްކާ ވާހަކަތަކެއް ކަމަށެވެ. އަދި އެފިތުގައި އެއްވެސް ރައްޔިތަކު ނުޖެހުމަށް ފޮރިން މިނިސްޓަރު ޝާހިދު ވަނީ ގޮވާލައްވާފަ އެވެ. 

އޭގެ އިތުރުން ޝާހިދު ވިދާޅުވީ އުތުރުތިލަފަޅު އެއްބަސްވުމާއި ގުޅޭގޮތުން ވެސް ސަރުކާރުން ފަތުރަމުންދަނީ ފިތުނަވެރި ވާހަކަތަކެއް ކަމަށެވެ. އެތަނަކީ ކޯސްޓުގާޑުގެ ބަނދަރެއް ކަމަށާއި، އެތަނުގައި އިންޑިއާގެ ސިފައިން ނުތިބޭނެކަމަށް ޝާހިދު ވިދާޅުވި އެވެ. 

އެއާއެކު އޭނާ ވަނީ އުފާވެރި އަމާން ރާއްޖެއެއް ހޯދުމަށް ރައީސް ޞާލިހަށް ދެވަނަ ދައުރެއް ދެއްވުމަށް ހުރިހާ ރައްޔިތުންގެ ކިބައިން އެދިވަޑައިގެންފަ އެވެ. 

މި ސަރުކާރުން ވަނީ އިންޑިއާއާއެކު ގިނަ އެއްބަސްވުންތަކެއް ހަދާފައެވެ. އޭގެ ތެރޭގައި އަސްކަރީ އެއްބަސްވުންތަކެއް ވެސް ހިމެނެއެވެ. ރާއްޖޭގައި ތިބި އިންޑިއާ ސިފައިންގެ އަދަދު ހޯދުމަށް މައުލޫމާތު ހޯދާ ލިބިގަތުމުގެ ހައްގުގެ ދަށުން ޑިފެންސް މިނިސްޓްރީއަށް ހުށައެޅި ނަމަވެސް އެ އަދަދު ހާމަނުކުރުމަށް އެ އިދާރާއިން ވަނީ ކޯޓަށް ގޮސްފައެވެ. 

އެކަންކަމާއި ގުޅިގެން އިންޑިއާ ސިފައިން ރާއްޖޭގައި ތިބުމާއި ދެކޮޅަށް "އިންޑިއާ އައުޓު" ގެ ނަމުގައި ވަނީ ހަރަކާތެއް ވެސް ފަށާފައެވެ. އަދި މި ހަރަކާތަށް ވަރަށް ބޮޑު ތަރުހީބެއް ލިބިގެންދިޔަކަން ވެސް ފާހަގަކުރެވެއެވެ.