ކޮވިޑް-19 ގެ ބަލިމަޑުކަމުގައި ދިމާވެދާނެ އެންމެ ނުރައްކާތެރި ޙާލަތުގައި ރައްޔިތުންނަށް ފަރުވާދިނުމަށް ވެންޓިލޭޓަރުތަކެއް ގަތުމުގެ ހިންގި ކޮރަޕްޝަންގެ ތުހުމަތު އޮތް އޭރުގެ ހެލްތު މިނިސްޓަރު އަބްދުالله އަމީނު ރިޔާސީ އިންތިޚާބުގެ ދެވަނަ ބުރުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ތާއީދުކޮށްފި އެވެ. 

އަމީނަކީ ވެންޓިލޭޓަރުތައް ގަތުމުގެ ނަމުގައި ހެލްތު މިނިސްޓްރީތެރެއިން ހިންގި 30.4 މިލިއަންގެ ކޮރަޕްޝަން މައްސަލައިގައި ދައުވާކުރި ފަރާތެކެވެ.

އޭނާގެ މައްޗަށް ދައުވާ އުފުލުމާއެކު ވަނީ މަޤާމުގެ މަސްއޫލިއްޔަތުތަކުން އެއް ފަރާތްކޮށްފަ އެވެ. އެފަހުން އަމީނު ވަނީ މަގާމުން އިސްތިއުފާދީފަ އެވެ. އަމީނު މަގާމުން އިސްތިއުފާދިން އިރު އޭނާގެ އިތުބާރު ނެތްކަމުގެ މައްސަލަ އޮތީ މަޖިލީހަށް ވައްދާފަ އެވެ. 

ރައީސް އިބްރާހިމް މުހައްމަދު ޞާލިހަށް ތާއީދުކުރަން ނިންމާ އެކަން އަމީނު އިއުލާނުކުރައްވާފައި ވަނީ މިރޭ މާލޭގައި ބޭއްވި ރައީސް ޞާލިހުގެ ކެމްޕޭނު ޖަލްސާގަ އެވެ. އެ ޖަލްސާގައި ވާހަކަދައްކަވަމުން އަމީނު ވަނީ ރައީސް ޞާލިހަށް ވަރަށް ބޮޑަށް ތައުރީފު ކުރައްވާފަ އެވެ. 

ކޯވިޑްގެ ހާލަތު ރާއްޖެއާއި ބައްދަލުކުރުމާއި ގުޅިގެން ރާއްޖޭގެ އާބާދީއަށް ބަލައި ހާލަތަށް ބޭނުންވާ 145 ވެންޓިލޭޓަރު ގަތުމުގެ މަސައްކަތް ސަރުކާރުން ފަށާފައިވާކަން އިއުލާނުކުރި އެވެ. 

ވެންޓިލޭޓަރުތައް ހޯދުމަށް ޖުމްލަ ތިން ކުންފުންޏަކާއެކު ސަރުކާރުން އެއްބަސްވުން ހެދިއެވެ. އޯޑިޓް ރިޕޯޓުގައި ފާހަގަކޮށްފައިވާ ޑުބާއީ ކުންފުންޏަކީ އޭގެ ތެރެއިން އެއް ކުންފުންޏެވެ.

އެ ކުންފުންޏާއެކު ހެދި އެއްބަސްވުމުގެ ދަށުން އެޑްވާންސްގެ ގޮތުގައި ވެންޓިލޭޓަރުތައް ގަތުމުގެ އަގުގެ 90 އިންސައްތައަށް ވާ 30.4 މިލިއަން ރުފިޔާވެސް ދައްކާފައިވާކަން އޯޑިޓް ރިޕޯޓުން ވަނީ ހާމަވެގެން ގޮސްފައެވެ. 

އެހެން ނަމަވެސް ސިއްހީ ކުައްލި ނުރައްކަލުގެ ހާލަތު އުވާލިއިރުވެސް އެންމެ ވެންޓިލޭޓަރެއް ވެސް ގެނެވިފައެއް ނުވެއެވެ. އަދި ވެންޓިލޭޓަރުތައް ގަތުމަށް ކުރި ޚަރަދުވެސް ހޯދިފައެއް ނުވެއެވެ. 

އެފަހުން ސަރުކާރުން ވަނީ ވެންޓިލޭޓަރު މައްސަލަ ފައިލުކޮށް، އެ މައްސަލައިގައި ތުހުމަތުކުރެވޭ އެއްވެސް މީހެއްގެ މައްޗަށް ދައުވާ ނުކުރުމަށް ނިންމާފަ އެވެ.