އުތުރު ތުލަފަޅުގައި އަޅަމުންދާ އެމްއެންޑީއެފްގެ "އެކަތަ ބަނދަރު" ގެ މަޝްރޫއުގެ މަސައްކަތް ކުރިއަށް ގެންދާ ގޮތް ބެލުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ދަޢުވަތު އަރުއްްވާފައިވާއިރު، ސަރުކާރުން އެ ފުރުސަތު ދީފައިވަނީ ބައެއް މީޑިއާ ތަކަަށް ވުމުން، ގިނަބައެއްގެ ނުރުހުން ސަރުކާރަށް އަމާޒުވެއްޖެ އެވެ. 

ފަނަރަ ހެކްޓަރުގެ ބިން ހިއްކައިގެން މިދިޔަ ޖެނުއަރީ މަހު ތަރައްގީ ކުރަން ފެށި އުތުރު ތިލަފަޅަކީ އިންޑިޔާ ސަރުކާރުގެ އެހީގައި ހަދަމުންދާ ތަނެކެވެ. އަދި "ބިންވެރިޔާ" މަޝްރޫއުގެ ދެވަނަ ފިޔަވަހީގެ ގޮތުގައި ސަރުކާރުން ކުރިޔަށް ގެންދާ މަޝްރޫއުގެ ދަށުން އެތަނުން މާލެ ސަރަހައްދުގައި ދިރިއުޅޭ ރައްޔިތުންނަށް ގޯތި ދޭން ނިންމާފައިވާކަމަށް މިމަހު 23 ވަނަ ދުވަހުގެރޭ އެމްޑީޕީގެ ސޯސަން ޖަގަހާގައި ބޭއްވި ޖަލްސާއެއްގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ އިޢުލާން ކުރައްވާފައެވެ.

އަދި އުތުރު ތިލަފަޅުން ގޯތި ދޭނީ ސިފައިންނަަށް ކަނޑައަޅާފައިވާ ބައިގެ ފަހަތުން 251 ހެކްޓަރުގެ ބިން ހިއްކައިގެން ކަމަށް ސަރުކާރުން ވަނީ ބުނެފައެވެ. 

Advertisement

މީގެ އިތުރުން ވެސް އެރޭގެ ޖަލްސާގައި ރައީސް ޞާލިހް ވަނީ އުތުރުތިލަފަޅާއި ގުޅިގެން އިދިކޮޅުން ދައްކަމުންދާ ވާހަކަތަކަށް ރައްދު ދެއްވައި ޝައްކު އުފެދޭނަމަ އެތަންތަން ދައްކަވަން ތައްޔާރަށް ހުންނެވި ކަމަށް ވިދާޅުވެފައެވެ. 

ރައީސް ޞާލިހް މިފަދައިން ވިދާޅުވުމާއި ގުޅިގެން ބައެއް ނޫސްވެރިން އޭގެ އަނެއް ދުވަހު، އުތުރު ތިލަފަޅުން ގޯތި ދޭ ސަރަހައްދު ބެލުމަށް ދިޔުމުން ހުއްދަނެތި އައީ ކަމަށް ބުނެ އެތަނުގައި ހުރި އޮފިޝަލް ވަނީ އެ ނޫސްވެރިން އެތަނުން ފޮނުވާލާފައެވެ. 

އަދި އެކަން ކުށްވެރިކޮށް އެމްއެންޑީއެފްއިން ނެރުނު ބަޔާނެއްގައި، ބުނެފައިވާގޮތުގައި އެ ނޫސްވެރިން އެގޮތަށް ކަން ކޮށްފައިވަނީ "އުތުރު ތިލަފަޅުގައި ތަރައްގީ ކުރަމުން އަންނަ ބަނދަރުގެ މަސައްކަތް ދައްކާލުމަށް ވަރަށް ފަހުންވެސް އެކަމަށް އެދުނު މީޑިއާތަކަށް ފުރުސަތު ފަހިކޮށްދީފައިވަކޮށް" ކަމަށެވެ. 

އެމްއެންޑީއެފް އިން އެހެން ބުނެފައި އެވަނީ މިމަހު 16 ވަނަ ދުވަހު ސަރުކާރުން ހޮވާލެވިފައިވާ މަދު މީޑިއާތަކަށް އެތަން ދެއްކުމުން އެކަމަށް އިޝާރާތް ކޮށެވެ. 

އެހެން ނަމަވެސް، އެތަން ބެލުމަށް "އެދިފައިވާ މީޑިއާ" ތަކޭ އެމްއެންޑީއެފްއިން ބުނެފައިވާ އިރު، އެއީ ސީދާ ސަރުކާރާއި އެމްއެންޑީއެފްއިން ބައެއް ނޫސްތަކަށް ދިން ދައުވަތަށް އެ އެ ނޫސްވެރިން ކުރި ދަތުރެއްކަން މިހާރު ނޫހުގައި ވެއެވެ.

އަދި ސަރުކާރުން އެ ދައުވަތު ދީފައިވަނީވެސް، ސަރުކާރަށް ތާއީދުކޮށް ނުވަތަ "ޕްރޮމޯޓް ކޮށް" ޚަބަރުފަތުރާ މީޑިއާ ތަކަކަށްކަން ފާހަގަކޮށްލަންޖެހެއެވެ. އެނޫން މީޑިއާ ތަކަށް އެ ދައުވަތެއް ނުލިބެއެވެ. 

މިއީ ސަރުކާރުން މިފަދައިން ކަން ކޮށްފައިވާ ފުރަތަަމަ ފަހަރެއް ނޫނެވެ. އެގޮތުން، ތިލަމާލެ ބްރިޖް މަޝްރޫއު ކުރިއަށްދާ ގޮތާ، ސަރުކާރުން އަޅާ ފުލެޓް ތައް ދައްކާލުމާއި، ގުޅިފަޅުން ދޫކުރާ ގޯތިތައް ދައްކާލަންވެސް ސަރުކާރުން ދަޢުވަތު ދީފައިވަނީ އެ މީޑިއާތަކަށްކަން ފާހަގަކޮށްލަންޖެހެއެވެ.