އެއްގަމު ދަތުރުފަތުރުގެ ގާނޫނަށް ޢަމަލުކުރުމަށް ރައްޔިތުންނަށް ބާރު އެޅުއްވުމަށާއި، ޓްރެފިކާ ގުޅޭ އުސޫލުތަކާ ޚިލާފުވެގެން ކޮށްފައިވާ ޖޫރިމަނާ މަޢާފުކުރެއްވުމަށް ރައީސުލްޖުމްހޫރިއްޔާ ނިންމެވި ނިންމެވުމާ އެއްގޮތަ ޖޫރިމަނާ މައާފު ކޮށްދޭން އެދުމަށް ހުޅުވާލައިފި އެވެ. 

ޕާކިން ޖޫރިމަނާތަކުގެ ތެރެއިން 2018 ވަނަ އަހަރުން ފެށިގެން މިހާތަނަށް ދައުލަތަށް ނުލިބިވާ ހުރިހާ ފައިސާއެއް ރައީސް އިބްރާހީމް މުޙައްމަދު ޞާލިހު މާފުކުރައްވާފައިވާކަން ސަރުކާރުން އިއުލާން ކުރީ ސެޕްޓެމްބަރު 5 ވަނަ ދުވަހުއެވެ. 

އަދި ޕާކިން ޖޫރިމަނާ ފިޔަވާ، އެހެނިހެން ޓްރެފިކް ޖޫރިމަނާތައް ދެއްކުން ލުއިކުރުމުގެ ގޮތުން، ބައެއް ހާލަތްތަކުގައި ތަމްރީނެއް ފުރިހަމަކޮށްގެން ޖޫރިމަނާ މާފުވާނެ ގޮތް ސަރުކާރުން ކަނޑައަޅުއްވާފައިވާކަމަށްވެސް ސަރުކާރުން ވަނީ ބުނެފައެވެ. 

އެ ނިންމެވުމާ ގުޅިގެން ޓްރާންސްޕޯޓު މިނިސްޓްރީން މިއަދު ކުރި އިއުލާނެއްގައި ވަނީ، 17 ނޮވެމްބަރު 2018 އިން ފެށިގެން މި މަހުގެ 5 ވަނަ ދުވަހުގެ ނިޔަލަށް ޓްރެފިކާ ގުޅިގެން ކޮށްފައިވާ ޖޫރިމަނާތައް މައާފުކޮށްދިނުމަށް އެދުމުގެ ފުރުސަތު ހުޅުވާލައިފަ އެވެ.

އަދި ޓްރެފިކް ޖޫރިމަނާ މައާފުކޮށްދިނުމަށް އެދުމުގެ ފުރުސަތު އަންނަ މަހުގެ 25އާ ހަމައަށް އޮންނާނެ ކަމަށް ވެސް ބުނެފައިވެއެވެ. 

އެގޮތުން ޖޫރިމަނާ މައާފުކޮށްދިނުމަށް އެދެން ޖެހެނީ ސިމްސް ޕޯޓަލް މެދުވެރިކޮށް ކަމަށް އެ މިނިސްޓްރީން ބުނެއެވެ. 

ޓްރާންސްޕޯޓް މިނިސްޓްރީން އިތުރަށް ބުނީ، ޖޫރިމަނާ މަޢާފުކުރެވޭނީ ޓްރެފިކާ ގުޅޭ ގަވާއިދުތަކާއި އިޖުތިމާޢީ އެހެން މައްސަލަތަކަށް ހޭލުންތެރިކުރުމަށް މޯލްޑިވްސް ޕޮލިސް ސަރވިސް އިން ފަރުމާކޮށް ކަނޑައަޅާ 20 (ވިހި) ގަޑިއިރުގެ ޓްރެއިނިންގ ޕްރޮގްރާމެއް ފުރިހަމަކުރުމުން ކަމަށެވެ. 

އެ އިއުލާން ގައިވާ ގޮތުން ރައީސުލްޖުމްހޫރިއްޔާގެ ނިންމެވުމާ ގުޅިގެން މަޢާފުކުރެވިގެންދާ ޖޫރިމަނާގެ ބާވަތްތަކުގެ ތެރޭގައި ހިމެނޭނީ؛ 

- ލައިސަންސް އާ ގުޅޭ ޖޫރިމަނާ

- ގަވާއިދާ ޚިލާފަށް ދުއްވައިގެން ކޮށްފައިވާ ޖޫރިމަނާ

- އުޅަނދުގައި ހުންނަންޖެހޭ ތަކެތި ހަމަނުވެ ދުއްވުން ނުވަތަ ބޭނުންކޮށްގެން އަރާފައިވާ ޖޫރިމަނާ 

- ޓެކްސީއާ ގުޅޭގޮތުން ކޮށްފައިވާ ޖޫރިމަނާ