ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު މޫސާ ސިރާޖާއި ލ. އަތޮޅުގެ ކައުންސިލް ރައީސް އިސްމާއިލް އަލީ (ގަމު އިއްސެ) ގެ އިތުރުން ވެރިކަން ކުރާ މައި ޕާޓީ އެމްޑީޕީ އަދި އެހެނިހެން ޕާޓީތަކުގެ ގިނަ ބަޔަކު ޕީޕީއެމާ ގުޅިއްޖެއެވެ.

އެ ހުރިހާ ބޭފުޅުން ޕީޕީއެމަށް ސޮއިކޮށްފައި ވަނީ ރޭ ލ ގަމުގައި ބޭއްވި ބޮޑު ޖަލްސާގައެވެ. އެބޭފުޅުންގެ ފޯމާއި ހަވާލުވެވަޑައިގެންނެވީ އިދިކޮޅު ކޯލިޝަނާއި ވަގުތީ ގޮތުން ހަވާލުވެވަޑައިގެން ހުންނެވީ ޕީއެންސީގެ ރައީސް އަބްދުއްރަހީމް އަބްދުالله އަދި އިދިކޮޅު ކޯލިޝަންގެ ކެންޑިޑޭޓް ޑރ. މުހައްމަދު މުއިއްޒު އާއެވެ.

މެންބަރު މޫސާ ސިރާޖު އެމްޑީޕީ މެންބަރެއްގެ ގޮތުގައި ހުންނެވުމަށްފަހު އެޕާޓީން ވަކިވެޑައިގެންނެވީ އޮގަސްޓް 21 ވަނަ ދުވަހުއެވެ. އަދި އެއަށްފަހު ރިޔާސީ އިންތިހާބުގެ ފުރަތަމަ ބުރުގައިވެސް ތާއީދު ކުރެއްވީ ޑރ. މުޢިއްޒަށެވެ. 

ލ. އަތޮޅު ކައުންސިލްގެ ރައީސްވެސް އެ މަގާމަށް އެމްޑީޕީގެ ޓިކެޓުގައި އިންތިހާބުވެވަޑައިގެންފައިވާއިރު އޭނާ ފަހުން ހުންނެވީ އެކަމަކު، ކުރީގެ ރައީސް މުހައްމަދު ނަޝީދު އިސްވެ ހުންނަވައި އުފެއްދެވި ދަ ޑިމޮކްރެޓްސްގެ މެންބަރެއްގެ ގޮތުގައެވެ.

ޕީޕީއެމާއި ގުޅިވަޑައިގެންނެވި ބައެއް ބޭފުޅުންނާއެކު ޑރ. މުޢިއްޒު އަދި އަބްދުއްރަހީމް އަބްދުالله 

ސިރާޖާއި އިސްމާއިލް އަލީގެ އިތުރުން ލ. ގަމުގެ އެކިއެކި އަވަށްތަކުގައި ތިބި އެމްޑީޕީ، ޖޭޕީ އަދި ޑިމޮކްރެޓްސް ގެ މެމްބަރުންތަކެއް ރޭ ވަނީ ޕީޕީއެމަށް ސޮއިކޮށްފައެވެ. އޭގެ ތެރޭގައި އެމްޑީޕީގައި 15 އަހަރާއި 16 އަހަރު ދުވަސް ވަންދެން މަސައްކަތް ކުރި މެމްބަރުން ވެސް ހިމެނެއެވެ. 

އެ ހުރިހާ މެންބަރުންނަށްވެސް މުޢިއްޒު ވަނީ މަރުހަބާ ދަންނަވާ ޝުކުރު އަދާކުރައްވާފައެވެ.