ރައީސް އިބްރާހިމް މުޙައްމަދު ޞާލިޙުގެ ޓީމުގެ މުށުން ލ.އަތޮޅު ގޮއްސި ކަމަށާއި އިންތިޚާބުގެ ދެވަނަ ބުރުގައި ރައީސް ޞާލިޙް އަށް 38% ވެސް ނުލިބޭނެ ކަމަށް ނައިފަރު ދާއިރާގެ މެމްބަރު އަޙްމަދު ޝިޔާމް ވިދާޅުވެއްޖެއެވެ.

ޝިޔާމް މިހެން ވިދާޅުވީ އޭނާ ކުރެއްވެވި ޓްވީޓެއްގައެވެ.

ޝިޔާމް ވިދާޅުވީ ރައީސް ޞާލިޙްގެ އެންމެ ވަރުގަދަ މިނިސްޓަރ އަދި އެމަނިކުފާނުގެ އެންމެ ގާތް އަޚް ފައްޔާޒް އިސްމާއިލް ގެ ލ.ގަން އަދި މުޅި ލ.އަތޮޅުވެސް އެބޭފުޅުންގެ މުށުތެރެއިން ދިޔުމުން އިންތިޚާބުގެ ދެވަނަ ބުރުގައި ރައީސް ޞާލިޙަށް 38%ވެސް ލިބިވަޑައިނުގަންނަވާނެކަން މިހާރު ޔަޤީންވާނެ ކަމަށެވެ.

Advertisement

ޝިޔާމް ވިދާޅުވީ ފެން ނުހިފޭ ވަޢުދުތައް ވުން ހުއްޓާލުމަށާއި މި 5 އަހަރަށްވީ ވަޢުދުތައްވެސް ނުފުއްދި ހުރީ ފުނިޖެހިފައި ކަމަށެވެ.

"ނޮވެމްބަރު 17 އާ މިދޭތެރޭ މިހިނގާ ދުވަސްތަކުގައި ދަޢުލަތުން މާލީ ބުރައެއް އުފުލަންޖެހޭ އެއްވެސް ވަޢުދެއް ވެވަޑައިގެންނެވުމުގެ ޤާނޫނީ އިޚުތިޔާރެއް ރައީސް ޞާލިޙަކަށް ނޯންނާނެ، ޤައުމު އަޅުވެތިކޮށް ޤައުމުގެ މަސްކަނޑު ވިއްކާލާ ޤައުމު އިޤްތިޞާދީ އަނދަވަޅަކަށް ވައްޓާލާ އާއިލާތައް ނިކަމެތިކޮށް ދަރަނިވެރިކުރުވުމަށްވުރެ ބޮޑު އަނިޔާއެއް ވަކި ކޮބައިތޯ؟" ޝިޔާމް ވިދާޅުވިއެވެ.

ޝިޔާމް މިހެން ވިދާޅުވިއިރު ރޭ ލ.އަތޮޅުގައި ބޭއްވުނު ޖަލްސާގައި ފޮނަދޫ ދާއިރާގެ މެމްބަރު މޫސާ ސިރާޖާއި ލ. އަތޮޅުގެ ކައުންސިލް ރައީސް އިސްމާއިލް އަލީ އަދި އެމްޑީޕީ އަދި އެހެނިހެން ޕާޓީތަކުގެ ގިނަ ބަޔަކު ޕީޕީއެމާއި ވަނީ ގުޅިފައެވެ.