‏އަދާލަތު ޕާޓީގެ ރައީސް، އަދި ހޯމް މިނިސްޓަރު ޢިމްރާން އަބްދުالله އަކީ ދީނީ ޢިލްމު ކިޔަވައިގެން ހުންނެވި ބޭފުޅެއް ނަމަވެސް އޭނާގެ ބެލުމުގެ ދަށުން ހިނގަމުންދާ ފުލުހުންގެ މުވައްސަސާ އިން ދީނަށް ފުރައްސާރަ ކުރި މީހުންވެސް ފުރުވާލީ ބޭރަށް ކަމަށް ހޯރަފުށީ ދާއިރާގެ ކުރީގެ މެންބަރު މުހައްމަދު އިސްމާއިލް ވިދާޅުވެއްޖެއެވެ. 

މުހައްމަދު އިސްމާއިލް ކުރެއްވި ޓްވީޓެއްގައި ވިދާޅުވީ، މި ސަރުކާރަކީ ދީނީ ޢިލްމް ކިޔަވައިގެން ހުރި ބޭފުޅެއް ހޯމް މިނިސްޓަރަކަށް ލައިގެން އެންމެ ގިނަ ލާދީނީ ކަންކަން ކުރި ސަރުކާރު ކަމަށެވެ. 

އަދި އޭނާ ވަނީ އެފަދައިން ވިދާޅުވާ ސަބަބުވެސް ހާމަ ކުރައްވާފައެވެ. އެގޮތުން ވިދާޅުވީ، ސަރުކާރުގެ މަތިފަޑީގައި ތިއްބެވި ބައެއް ބޭފުޅުންނާއި، ސިޔާސީ ގޮތުން ނުފޫޒު ގަދަ ބައެއް ފަރާތްތަކާއި އެފަރާތްތަކާއި ގުޅުންހުރި މީހުންގެ އިތުރުވެސް ގިނަ ބަޔަކު އެއްޖިންސުން ގުޅުން ހިންގި މައްސަލަތަކެއް މި ސަރުކާރުގައި ފެންމަތިވެގެން ދިޔައިރު، އެކަމަށް ތުހުމަތުވި ގިނަ މީހުން ހައްޔަރު ވެސް ނުކުރެވޭ ކަމަށެވެ. 

"ސަފާރީ ރޭޕް ކޭސް ނުބެލުނު. ދީނަށް ފުރައްސާރަކުރި މީހުން ބޭރަށް ފުރުވާލި. އެމީހުން ހައްޔަރު ކުރަން ރެޑް ނޯޓިސް ގަނޑެއްވެސް ނުނެރެވުނު." މުހައްމަދު އިސްމާއިލް ވިދާޅުވި އެވެ. 

ކަންމިހެން ހުރި ނަމަވެސް، ފުލުހުން ވަނީ މުންކަރާތް ހުއްޓުވަން ނުކުތް ޝެއިޚުންގެ ބިޑި އަޅުވައިގެން ހައްޔަރުކޮށް ޖަލަށްވެސް ލާފައި ކަމަށް އޭނާ ވިދާޅުވި އެވެ. އަދި އެކަމުގެ ތެރެއިން ޝެއިޚް ނިޝާންގެ ދަރިފުޅަށް ނަފްސާނީ ގޮތުން ގެއްލުންތައް ލިބިފައިވާ ކަންވެސް އޭނާ ފާހަގަކުރެއްވިއެވެ.

"އަނިޔާވެރިއެއް ނުވާނަމޭ ބުނާ އިރު ވާނުވާގައި އެތައް ބަޔަކު. ދެންވެސް އިތުރު ފުރުސަތެއް ދޭންވީ ހެއްޔެވެ؟" މުހައްމަދު އިސްމާއިލް ވިދާޅުވި އެވެ.