ރިސޯޓް މުވައްޒަފުންނަށް ހަފްތާއަކު ދެ ދުވަހު ޗުއްޓީ ލިބޭނެ މަގު ފަހިކޮށްދިނުމަށް މަސައްކަތް ކުރައްވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރައީސް ޞާލިހު މިފަދައިން ވިދާޅުވީ މާލޭގެ މާވެޔޮ މަގުގައި ރޭ ބޭއްވި ކެމްޕެއިން ޖަލްސާއެއްގައި ވާހަކަފުޅު ދައްކަވަމުންނެވެ. 

ރައީސް ވިދާޅުވީ ރިޔާސީ އިންތިޚާބުގެ ފުރަތަމަ ބުރަށްފަހު މި ފާއިތުވި ދުވަސްތަކުގައި އެމަނިކުފާނު އެކި ފަރާތްތަކާ ބައްދަލުކުރައްވައި އެ ފަރާތްތަކުގެ ހުރި ކަންބޮޑުވުންތައް އަޑުއެއްސެވި ކަމަށެވެ. 

އެގޮތުން ރިސޯޓް މުވައްޒަފުންނާއެކު ބޭއްވުނު ބައްދަލުވުމުގައި މިނިމަން ވޭޖް ކަނޑައެޅުމަކީ އެ ފަރާތަކަށް ލިބުނު ވަރަށް ބޮޑު ހިތްހަމަޖެހުމެއް ކަމަށް އެ މުވައްޒަފުން ފާހަގަކުރެއްވި ކަމަށާ، އޭގެ އިތުރަށް ސަރުކާރުން ރަނގަޅު ކުރަންޖެހޭ ކަންތައްތަކެއްގެ ލަފާވެސް އެ މުވައްޒަފުންގެ ފަރާތުން ލިބުނު ކަމަށް ރައީސް ވިދާޅުވިއެވެ.

ދެ ވަނަ ކަމަކަށް، ހަފުތާއަކު މަސައްކަތްކުރާ 48 ގަޑިއިރު 40 ގަޑިއިރަށް މަދުކޮށް، ހަފުތާއަކު ދެ ދުވަހު ޗުއްޓީއެއް ލިބޭނެ ގޮތް ހަމަޖައްސައިދިނުމަށް އެދުނު ކަމަށް ވިދާޅުވި އެވެ. މިނިމަން ވޭޖު ކަނޑައެޅި ގޮތަށް ރިސޯޓު އޯނަރުންނާ ވާހަކަ ދައްކައިގެން އެކަން ހައްލުކުރާނެ ކަމަށް އެ މަނިކުފާނު ވިދާޅުވި އެވެ.

މީގެ އިތުރުން ރައީސް ވިދާޅުވީ ބޭރު މީހުން ރިސޯޓުތަކުގެ އިސް މަގާމުގައި ތިބޭ މައްސަލައަށް ހައްލު ހޯދުމަށް، އެ މަގާމުތަކަށް ދިވެހިން ތަމްރީނުކުރުމަށް ޓޫރިޒަމް އިންޑްސްޓްރީއަށް ސްކޮލަޝިޕް ސްކީމެއް އުފައްދައި އޭގެ ދަށުން ޖެނެރަލް މެނޭޖަރުންނާ ހިސާބަށް މީހުން ތަމްރީނުކުރާނެ ކަމަށެވެ.

"ސަރުކާރުން ދޭ ސްކޮލާޝިޕްގެ ތެރޭގައި ހާއްސަކޮށް ޓޫރިޒަމް އިންޑަސްޓްރީގެ މަތީ ފަންތީގެ މަގާމުތަށް ހިމެނޭގޮތަށް ސްކޮލާޝިޕް ސްކީމެއް އުފައްދާ އޭގެ ތެރެއިން ރިސޯޓްތަކުގެ ޖެނަރަލް މެނޭޖަރުންނާއި ހިސާބަށް މީހުން ޓްރެއިންކުރުމުގެ މަސައްކަތްތަކެއް ވީހާވެސް އަވަހަށް ފައްޓާނަން." ރައީސް ވިދާޅުވިއެވެ.