ރިޔާސީ އިންތިހާބުގެ ފުރަތަމަ ބުރުގައި ސަރުކާރު ހިންގާ މައި ޕާޓީ، އެމްޑީޕީ އާއި އެކު ކޯލިޝަން ހެދުމަށްފަހު، ދެވަނަ ބުރާއި ދިމާކޮށް އެ ކޯލިޝަން ރޫޅާލި އެމްޑީއޭއަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ބަހުގެ ހަމަލާއެއް އަމާޒު ކުރައްވައިފިއެވެ.
އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާއެކު ރިޔާސީ އިންތިހާބުގެ ފުރަތަމަ ބުރުގައި ކޯލިޝަން ހެދި އެމްޑީއޭ އިން ރޭ ބޭއްވި ކައުންސިލް ބައްދަލުވުމުގައި ވަނީ އެމްޑީޕީއާ އެކުގައި އެ ޕާޓީން ހެދި ކޯލިޝަން ރޫޅާލައި، ރިޔާސީ އިންތިހާބުގެ ދެވަނަ ބުރުގައި އިދިކޮޅު ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ތާއީދު ކުރަން ފާސްކޮށްފައެވެ.
އެމްޑީޕީ އާއި އެކު ހަދައިފައިވާ ކޯލިޝަން ރޫޅާލުމަށް އެޕާޓީގެ ކައުންސިލަށް، ކައުންސިލް މެމްބަރު މުޙައްމަދު އައްބާސް ހުށައެޅުއްވުމުން އެޕާޓީގެ ނައިބު ރައީސް އަލީ މަޢުރޫފް ވަނީ އެކަމަށް ތާއީދު ކުރައްވައިފައެވެ. މި ކައުންސިލް ބައްދަލުވުމުގެ ރިޔާސަތު ބެލެހެއްޓެވީ ސިޔާމެވެ.
އެމްޑީޕީ ފުރަތަަމަ ބުރުގެ ކެންޕެއިންގެ ތެރެއިން-- ފޮޓޯ/ އަދަދު
މެންބަރު މުހައްމަދު އައްބާސްގެ ހުށަހެޅުން ފާސްވީ އެމްޑީއޭ ކައުންސިލް ބައްދަލުވުމުގައި ބައިވެރިވެވަޑައިގެންނެވި 35 މެމްބަރުންގެ ތެރެއިން 33 މެމްބަރުންގެ ވޯޓުންނެވެ. އެ ހުށަހެޅުމާ ދެކޮޅަށް އަދި ރައީސް އިބްރާހިމް މުހައްމަދު ސޯލިހަށް ތާއީދުކޮށް ވޯޓު ދެއްވާފައި ވަނީ އެންމެ ދެ މެމްބަރުންނެވެ.
އައްޑޫގައި ބޭއްވި މިއަދުގެ ބައްދަލުވުމުގެ ތެރެއިން--ފޮޓޯ/ އެމްޑީޕީ
އެކަމާއި ގުޅިގެން މިއަދު އައްޑޫގައި ބޭއްވި ކެންޕެއިން ބައްދަލުވުމައި ވާހަކަ ދައްކަވަމުން ރައީސް ޞާލިހް ވިދާޅުވީ، ފުރަތަަމަ ބުރުގައި އެމްޑީޕީ އާއި އެކު ތިއްބެވި ބައެއް ފަރާތްތައް އެ ޕާޓީއާއި ވަކިވުމަކީ ބައެއް ފަރާތްތައް މާޔޫސްވެދާނެ ކަމެއް ކަމަށެވެ. އެހެން ނަމަވެސް އެކަމާއި ކަންބޮޑު ނުވުމަށް ރައީސް ޞާލިހު ވަނީ އެދިވަޑައިގެންފަ އެވެ.
އަޅުގަނޑުމެންނަށް އެނގޭ ކުރީ ބުރުގައި އެބޭފުޅުން އަޅުގަނޑުމެންނަށް ކޮށްދެއްވި މަސައްކަތްތައް. އެކަމަށްޓަކައި އަޅުގަނޑުމެން އެބޭފުޅުންނަށް ޝުކުރުވެސް އަދާކުރަން. އަޅުގަނޑުމެން އެބޭފުޅުންނަށް ހެޔޮ ރަނގަޅު މުސްތަގުބަލަކަށްވެސް އެދެން.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
މިއާއެކު، އެމްޑީއޭ އިން އެ ނިންމި ނިންމުމަކީ ރަނގަޅު ނިންމުމެއް ނޫންކަން އެ ބޭފުޅުންނަށްވެސް ފަހުން ފެނިގެންދާތަން، ފެންނާނެ ކަން ފާހަގަކުރައްވައި ރައީސް ޞާލިހު ވަނީ އެމްޑީއޭ އަކީ އެ ކޯލިޝަންގައި އޮތް ދާ އަންނައުނެއްގެ ގޮތުގައި ސިފަ ކުރައްވާފައެވެ.
ދިވެހިންގެ ތެރޭގައި ބުނެ އުޅޭ މުހާވިރާ ބަހެއް އޮވޭ. އަންނަ އެއްޗެހީގެ ތެރޭގައި ދާ އެއްޗެހި ހުންނާނެ އޭ ކޮންމެވެސް ވަރަކަށް. އެހެންވީމާ އެކަހަލަ ކަންތައް ދިމާވާނެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
އެހެން ކަމުން ރައީސް ޞާލިހު ވަނީ ކަންބޮޑުނުވެ އެމްޑީޕީއަށް ތާއީދު ކުރާ އެންމެހާ ފަރާތްތައްވެސް ކުރިއަށް ވަޑައިގެންނެވުމަށް އެދިލައްވާފައެވެ. އަދި އެމަނިކުފާނަށް ކާމިޔާބީ ވާނެ ކަމަށްވެސް ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
