ގައްދޫ ދާއިރާގެ މެންބަރު އަހުމަދު ޒާހިރު އާއި ގައްދޫ ގިނަ ޑިމޮކްރެޓުންގެ ޕީޕީއެމް/ ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒަށް ތާއީދު ކުރަން ނިންމަވައިފިއެވެ.
ޒާހިރު އަކީ އެމްޑީޕީގެ ޓިކެޓުގައި މަޖިލީހަށް އިންތިހާބުވެ ވަޑައިގެންނެވި މެންބަރެކެވެ. ނަމަވެސް ފަހުން އެމްޑީޕީގެ ތެރޭގައި އުފެދުނު ޚިޔާލު ތަފާތުވުންތަކުގެ ތެރެއިން ކުރީގެ ރައީސް މުހައްމަދު ނަޝީދަށް ތާއީދު ކުރާ މެންބަރުން އެ ޕާޓިން ކެނޑި ޑިމޮކްރެޓްސް ގެ ނަމުގައި އައު ޕާޓީއެއް އުފައްދެވިއިރު އޭގެ ތެރޭގައި ޒާހިރު ވެސް ހިމެނިވަޑައިގަންނަވައެވެ.
އޭގެ ކުރިންވެސް އޭނާ އައީ މަޖިލީހުގެ ތެރެއިން ސަރުކާރަށާއި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ވަރަށް ބޮޑަށް ފާޑުވިދާޅުވެ ވާހަކަ ދައްކަވަމުންނެވެ.
ރިޔާސީ އިންތިހާބުގެ ދެވަނަ ބުރުގައި ޑިމޮކްރެޓްސް ޕާޓީން ވަކި ކޮޅަކަށް ނުޖެހެން ނިންމާފައި ވީ ނަމަވެސް އެ ޕާޓީގެ ގިނަ މެންބަރުން އަންނަނީ ޑރ. މުޢިއްޒަށް ތާއީދު ކުރާކަން ހާމަ ކުރަމުންނެވެ.
އަދި އޭގެ ތެރެއިން ގިނަ މެންބަރުން އަންނަނީ އިދިކޮޅުު އެންމެ ބޮޑު ޕާޓީ ޕީޕީއެމާވެސް ގުޅެމުންނެވެ.
Advertisement
This content is created and paid for by advertisers and does not involve Voice Journalists
