އެމްޑީޕީ މިހާރު ވަނީ އެ ޕާޓީގެ މިސްރާބު އޮޅިފައި ކަމަށާއި އެކަން ދިމާވެފައިވަނީ ޕާޓީގެ ކުރީގެ ރައީސް މުހައްމަދު ނަޝީދު އެ ޕާޓީގައި ނެތުމުން ކަމަށް މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ވިދާޅުވެއްޖެއެވެ.

ރިޔާސީ އިންތިހާބުގެ ފުރަތަމަ ބުރުގައި އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް މުޅި ރާއްޖެއިން ލިބުނު ނާކާމިޔާބީ އާއެކު އެ ޕާޓީއަށް އޮތް ތާއީދު ކުޑަވަމުން ދިޔުމާއި ގުޅިގެން އިމްތިޔާޒް ކުރެއްވި ޕޯސްޓެއްގައި ވިދާޅުވީ، ކުރިއަށް ކުރިއަށް ބާރަށް ކުރިއަށް، މި އޮޑިއެއް ނުފެތޭނެ، ބެލްޓު އަޅުއްވާ ބާރަށް، ވެއްޓޭ އިރަށްވުރެ ބާރަށް ތެދުވެ ދުއްވައިގަނޭ ފަދަ ޝިޔާރުތައް އެމްޑީޕީއިން އަދިވެސް ބޭނުންކުރާކަމަށެވެ.

އެހެން ނަމަވެސް، އެ ބަސްކޮށާރަކީ އެހެން ބޭފުޅަކާ، (ރައީސް ނަޝީދާ) ގުޅިފައިވާ އެއްޗެއް ކަމަށާ އަދި އެ ބޭފުޅާ މީހާރު އެމްޑީޕީގައި ނެތްކަމަށް އިމްތިޔާޒް ވިދާޅުވިއެވެ. އަދި އެމްޑީޕީއަށް ވީގޮތެއްވެ މިސްރާބު އޮޅިފައިވަނީ ރައީސް ނަޝީދު ޕާޓީގެ ހުންގާނުގައި ނެތުމުންކަމަށްވެސް އޭނާ ވިދާޅުވި އެވެ. 

Advertisement

އެމްޑީޕީގެ އެތެރޭގައި އުފެދުނު ޚިޔާލު ތަފާތު ވުންތަކާއި އެކު، ރައީސް ނަޝީދު އިސްވެ ހުންނަވައިގެން އެމްޑީޕީގައި ފިކުރެއްގެ ދިރުން ނަމުގައި ވަކި ގޮތްޕެއް އުފައްދަވާފައިވާއިރު، އެ ފަރާތްތަކުން ފަހުން އެމްޑީޕީން ވަކިވެ އައު ޕާޓީއެއް ވަނީ އުފައްދަވާފައެވެ.

އަދި ރައީސް ނަޝީދުވެސް ވަނީ ފަހުން އެމްޑީޕީ އާ ވަކިވެވަޑައިގެން ޑިމޮކްރެޓްސް އާއި ގުޅިވަޑައިގެންފައެވެ.