ދިވެހިރާއްޖޭގައި ވެރިކަން ކުރުމުގެ ނިޒާމާއި ގުޅޭ ގޮތުން ރައީސުލްޖުމްހޫރިއްޔާގެ އިބްރާޙީމް މުހައްމަދު ޞާލިހު އާއި އިންތިޚާބީ ރައީސް ޑރ މުހައްމަދު މުޢިއްޒުގެ ޚިޔާލުފުޅުވެސް އެއްގޮތް ކަން ހާމަވެއްޖެއެވެ.
އިންތިހާބުން މުއިއްޒު ހޯއްދެވި ކާމިޔާބީ ފާހަގަ ކުރުމަށް ރޭ ސޯޝަލް ސެންޓަރުގައި ކުރިއަށް ގެންދިޔަ އިވެންޓުގައި ވާހަކަ ދައްކަވަމުން ޑރ. މުއިއްޒު ވިދާޅުވީ ދިވެހިރާއްޖޭގެ 2 ލައްކަ އަށްވުރެ ގިނަ ރައްޔިތުން ނުކުމެ، ރިޔާސީ ނިޒާމުގެ ތެރެއިން މިހާރު ވެރިއަކު ކަނޑާއަޅާފައިވާ ކަމަށެވެ. އަދި އެހާ ގިނަ އަދަދެއްގެ މީހުން ނުކުމެ އެފަދައިން ނިންމުމުން ފުރުސަތު ލިބެންޖެހޭ ކަމަށް އެމަނިކުފާނު ވިދާޅުވި އެވެ
"މިއީ ރިޔާސީ ނިޒާމެއް. ރައްޔިތުން ނިންމީ ރިޔާސީ ނިޒާމަކުން، ދެލައްކަ ސާޅީހަކަށް ހާސް ރައްޔިތުން ނުކުމެ ވޯޓުލާފައި މިއޮތީ. މި ގައުމުގެ ރައްޔިތުން ބޭނުންވަނީ މިގޮތް. އެހެންވީމާ މިގޮތުގައި މިގައުމު ހިނގާނީ. މިގައުމަކު ރައްޔިތުން ބޭނުމެއް ނުވޭ އިރުއިރު ކޮޅާ އެކި ގޮތަށް ވާހަކަ ދައްކާކަށް. އިރާދަކުރެއްވިޔާ މި ގައުމު ދާނީ މިގޮތަށް"
އިންތިޚާބީ ރައީސް ޑރ. މުހައްމަދު މުޢިއްޒު
މުޢިއްޒުގެ އިތުރުން އިއްޔެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ބޭއްވި ނޫސްވެރިންގެ ބައްދަލުވުމުގައި އެމަނިކުފާނު ވެސް ވަނީ، އެމަނިކުފާނު ގަބޫލުކުރައްވާ ގޮތުގައި ދިވެހިރާއްޖެއަށް އެންމެ ރަނގަޅު ވާނީ ރިޔާސީ ނިޒާމް ކަމަށް ވިދާޅުވެފައެވެ.
"އަޅުގަނޑު ޕާސަނަލީ ގަބޫލުކުރަނީ، ގައުމަށް އެންމެ ފައިދާ ކުރާނީ ރިޔާސީ ނިޒާމުން ކަމަށް. އެއީ އަޅުގަނޑުގެ އަމިއްލަ ވިސްނުން. ޕާޓީގެ ވިސްނުން ޕާޓީން ނިންމާނީ."
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ޞާލިހާއި ޑރ. މުޢިއްޒު މިފަދައިން ވިދާޅުވެފައި ވާއިރު، ނިޒާމު ބަދަލު ކުރަން ރައްޔިތުންގެ ވޯޓަކަށް ކުރިން އަހާފައި ވާނަމަ، އަލުން އެހުމުގެ ބަދަލުގައި މަޖިލީހުގައި ނަގާ ވޯޓަކުން ނިޒާމު ބަދަލު ކުރެވޭގޮތަށް ގާނޫނަށް އިސްލާހު ގެންނަން ޑިމޮކްރެޓްސްގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ވަނީ މަޖިލީހަށް ބިލެއް ހުށަހަޅުއްްވާފައެވެ. އަދި ނިޒާމީ ވޯޓު އޮކްޓޯބަރ 30 ގެ ކުރިން ނަގަންވެސް ގަރާރެއް ޑިމޮކްރެޓްސް އިން ވަނީ މަޖިލީހަށް ހުށަހަޅުއްވާފައެވެ.
Advertisement
This content is created and paid for by advertisers and does not involve Voice Journalists
