ކުރިއަށް އޮތް ތަނުގައި އުފެދިގެން އަންނަ ރާއްޖޭގެ އައު ސަރުކާރާއި އިންޑިއާ ގުޅިގެން ސަރަހައްދީ ސަލާމަތާއި ރައްކާތެރިކަން ކަށަވަރު ކުރުމަށް މަސައްކަތް ކުރަމުން ދާނެ ކަމަށް އިންޑިއާގެ އެކްސްޓާނަލް އެފެއާޒް މިނިސްޓްރީގެ ތަރުޖަމާނު އަރިންދަމް ބާގްޗީ ވިދާޅުވެއްޖެ އެވެ.

އިންޑިއާގެ އެކްސްޓާނަލް އެފެއާޒް މިނިސްޓްރީ އިން ނިޔު ދިއްލީގައި ކޮންމެ ހަފްތާއަކު ބާއްވާ ނޫސްވެރިންގެ ބައްދަލުވުމުގެ ތެރެއިން އިއްޔެ ބޭއްވުނު ނޫސްވެރިންގެ ބައްދަލުވުމުގައި ނޫސްވެރިން ވަނީ ރިޔާސީ އިންތިހާބުގެ ނަތީޖާއާ އެކު ދެ ގައުމުގެ ގުޅުމަށް ބަދަލު އައިސްދާނެތޯ ސުވާލު ކޮށްފައެވެ. 

އެ ސުވާލުތަކަށް ޖަވާބު ދެއްވަމުން އަރިންދަމް ވިދާޅުވީ އިންތިހާބީ ރައީސަށް އެންމެ ފުރަތަމަ މަރުހަބާ ވިދާޅުވި ދުނިޔޭގެ ލީޑަރަކީ ބޮޑު ވަޒީރު ނަރެންދުރަ މޯދީ ކަމަށާއި މޯދީ ވަނީ އިންޑިއާ އާއި ރާއްޖެއާ ދެމެދު އޮތް ގުޅުން އިތުރަށް ބަދަހިކުރާނެ ކަމުގެ ޔަގީންކަން ދެއްވާފައި ކަމަށެވެ.

Advertisement

މިއާއެކު އަރިންދަމް ވިދާޅުވީ އިންޑިއާ އާއި ރާއްޖެއާ ދެމެދު ޒަމާނުއްސުރެ އޮތީ ގާތް އެކުވެރި ގުޅުމެއް ކަމަށާއި ދެ ގައުމަކީ އަވައްޓެރި ދެ ގައުމަށް ވާއިރު އެ ގުޅުން އެގޮޮތުގައި ދެމިއޮންނާނެ ކަމަށެވެ. 

"އިންތިހާބީ ރައީސް ޑރ. މުހައްމަދު މުއިއްޒު އާއި އިންޑިއާއިން ރާއްޖެ އަށް ކަނޑައަޅާފައި ހުންނަވާ ސަފީރު ވެސް ވަނީ ބައްދަލު ކުރައްވައިފަ. އެ ބައްދަލުވުމުގައިވެސް ރާއްޖެ އާއި އިންޑިއާއާ ދެމެދު އޮންނަ ގުޅުން ބަދަހިކޮށް އިތުރަށް ގުޅުން ވަރުގަދަ ކުރުމާ ގުޅޭ ގޮތުން ވަނީ މަޝްވަރާ ކުރެވިފައި" މުޢިއްޒާއި އިންޑިއާ ސަފީރު މުނުމަހާވަރް ގެ ބައްދަލުވުމުގައި ދެކެވުނު ވާހަކަތަކަށް އަލިއަޅުވާލައްވައި އަރިންދަމް ވިދާޅުވި އެވެ. 

މީގެ އިތުރުން ރާއްޖޭގައި ތިބި އިންޑިއާ ސިފައިން ބޭލުމަށް ޑރ. މުޢިއްޒު ވެވަޑައިގެންނެވި ވަޢުދާއި ގުޅިގެންވެސް ނޫސްވެރިން ވަނީ ސުވާލު ކޮށްފައެވެ. 

އެސުވާލަށް ސީދާ ޖަވާބެއް ނުދެއްވާ، އަރިންދަމް ވިދާޅުވީ، ރާއްޖެ އާއި އިންޑިއާއިން އެކުގައި ގިނަ ދާއިރާތަކަކުން މަސައްކަތް ކުރާ ކަމަށާއި ދެ ގައުމަށް އޮތް ކަންބޮޑުވުންތަކާއި ގޮންޖެހުންތަކާ ގުޅޭ ގޮތުން އެކުގައި މަސައްކަތް ކުރުމަށް އިސްކަންދޭނެ ކަމަށެވެ. ހާއްސަ ގޮތެއްގައި ސެކިއުރިޓީއާ ގުޅޭ ކަންކަމުގައި ދެ ގައުމުގެ ޕާޓްނަޝިޕްގެ ދަށުން މަސައްކަތްތައް ކުރާނެ ކަމަށް އަރިންދަމް ވިދާޅުވި އެވެ.

"ރާއްޖެއާ އެކު އޮންނަ ގުޅުމުގައި އެންމެ އިސްކަންދެނީ ކެޕޭސިޓީ ބިލްޑިންއަށް. އަދި ދެ ގައުމުގެ މަސްލަހަތާ ގުޅުން ހުރި ކަންކަމުގައި އެކުގައި މަސައްކަތް ކުރުމަށް.. ރާއްޖެ އާއި އިންޑިއާއިން ގުޅުން ބަދަހިކުރާ ދާއިރާތަކުގެ ތެރޭގައި ތަރައްގީ އާއި ސަރަހައްދީ ސަލާމަތީ ކަންތައް އަދި އިންސާނީ ވަގުފާރިއާ ދެކޮޅަށް މަސައްކަތް ކުރުން ހިމެނޭ،" އަރިންދަމް ވިދާޅުވި އެވެ.