ސިޔާސީ މަސައްކަތަށް ނިކުންނަންވާނީ ފާޑު ކިޔުންތައް އަންނާނެކަން އެނގި އެކަން ތަޙަންމަލު ކުރުމުގެ ވިސްނުމާވެސް އެކުގައި ކަމަށް ހޯމް މިނިސްޓަރު އަދި ޢަދާލަތު ޕާޓީގެ ރައީސް އިމްރާން އަބްދުالله ވިދާޅުވެއްޖެއެވެ. 

ޢިމްރާން މިއަދު ކުރެއްްވި ޓުވީޓެއްގައި ވިދާޅުވީ، ފާޑުކިޔުންތަކާ ކުރިމަތި ނުލާ އިސްލާހީ މަސައްކަތް، ވަކިން ޚާއްސަކޮށް ސިޔާސީ އިސްލާހީ މަސައްކަތް ކުރެވިދާނެކަމަށް ހީކުރުމީ ވަރަށްބޮޑު ކުށް ހީ އެއް ކަމަށެވެ. 

"ސިޔާސީ މަސައްކަތަށް ނިކުންނަންވާނީ ފާޑު ކިޔުންތައް އަންނާނެކަން އެނގި އެކަން ތަޙަންމަލު ކުރުމުގެ ވިސްނުމާވެސް އެކުގައެވެ." ޢިމްރާން ވިދާޅުވި އެވެ. 

ޢިމްރާން މިފަދައިން ވިދާޅުވެފައި މިވަނީ ކޮން ބަޔަކަށް އަމާޒު ކުރައްވައި ކަމެއް ސާފު ނުވި ނަމަވެސް، ޢާއްމު ގޮތެއްގައި އޭނާގެ ޓުވީޓުތައް އަމާޒުކުރައްވަނީ ސިޔާސީ މައިދާނުގައި އޭނާގެ ފިކުރާއި ދެކޮޅަށް މަސައްކަތް ކުރާ ފަރާތްތަކަށެވެ. ޚާއްސަކޮށް އިދިކޮޅުު ޕީޕީއެމް/ޕީއެންސީ އަށެވެ. 

ސިޔާސީ މައިދާނުގައި މަސައްކަތް ކުރާ މީހުންނަށް ފާޑުވިދާޅުވެ މާނަ ފުން ޓުވީޓުތަކާއި ތިލަ ޓުވީޓުތައްވެސް ދޭތެރެ ދޭތެރެއިން އޭނާ ކުރަމުން އަންނައިރު، އެފަދަ ޓުވީޓު ތަކުގެ ސަބަބުންނާއި އޭނާ ދައްކަވާ ބައެއް ވާހަކަތަކުގެ ސަބަބުން ވަރަށް ގިނަ ބައެއްގެ ފާޑުކިޔުންތައް އޭނާ އަށް އަމާޒުވަމުންދާކަންވެސް ފާހަގަކޮށްލަން ޖެހެއެވެ. 

އެގޮތުން ކުރިމަތިވާ ބައެއް ފާޑުކިޔުންތަކަށް ރައްދު ދެއްވާއިރު، ގިނަ ފަހަރަށް އެކަން ކަމާއި ގުޅިގެން އެއްޗެއް ވިދާޅުނުވެއެވެ.