މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޗެއާޕާސަންގެ މަޤާމުގައި ހުންނެވި ނަމަ އެންމެ ފުރަތަމަ ބައްލަވާނީ ރިޔާސީ އިންތިޚާބު ނާކާމިޔާބުވާން ދިމާވި ސަބަބުތަކަކީ ކޮބައިތޯ ކަމަށް އެމްޑީޕީއާއި ވަކިވެވަޑައިގެން ދަ ޑިމޮކްރެޓްސް އުފެއްދުމުގައި އިސްކޮށް އުޅުއްވި އެސްޓީއޯގެ ކުރީގެ މެނޭޖިން ޑިރެކްޓާ ހުސެއިން އަމްރު ވިދާޅުވެއްޖެ އެވެ. 

އަމްރު މިފަދައިން ވިދާޅުވެފައިވަނީ ދަ ޑިމޮކްރެޓްސްއިން ބޭއްވި ޖަލްސާއެއްގައި ވާހަކަދައްކަވަމުން ނެވެ. 

އެ ޖަލްސާގައި ވާހަކަދައްކަވަމުން އަމްރު ވިދާޅުވީ ކުޑަ ޕާޓީއަކުން ވާދަކޮށް ރާއްޖޭގައި އޮތް އެންމެ ބޮޑު ސިޔާސީ ޕާޓީ ބަލިކުރުމަކީ އާދައިގެ ކަމެއް ނޫން ކަމަށެވެ. އަދި އެފަދައިން އިންތިޚާބު ބަލިވުމަށް ދިމާވި ސަބަބުތައް ދެނެގަތުމަކީ މިވަގުތު އެމްޑީޕީން އެންމެ އިސްކަމެއް ދީގެން ކުރަން ޖެހޭނެ ކަމެއްކަމަށް ދެކިވަޑައިގަންނަވާ ކަމަށެވެ. 

Advertisement

އެހެން ނަމަވެސް އެހާ ބޮޑު ބައްޔެއް ވެގެން ދިޔައިރު، އެމްޑީޕީން ގައުމީ މަޖިލީސް ބާއްވާ އެންމެ ފުރަތަމަ އެޖެންޑާކުރީ ވެރިކަމުގެ ނިޒާމު ބަދަލުކުރުމަށް ފެންނަ ނުފެންނަ ވޯޓަކަށް އެހުމަށްކަމަށް އަމްރު ފާހަގަކުރެއްވި އެވެ. 

އެއާއެކު އޭނާ ވިދާޅުވީ އެއީ ހަގީގަތުގައި އެހާތަނަށް ވުޖޫދުގައިވެސް ނެތް މައްސަލައެއް ކަމަށެވެ. އަދި މިއަދު އަމްރު އެމްޑީޕީގެ ޗެއާޕާސަންގެ މަގާމުގައި ހުންނެވި ނަމަ، ރިޔާސީ އިންތިޚާބަށް ފަހު ބާއްވާ ފުރަތަމަ އެފަދަ ބައްދަލުވުމެއްގައި ނިޒާމާއި ބެހޭ މައްސަލަ އެޖެންޑާވެސް ނުކުރައްވާނެ ކަމަށް އަމްރު ވިދާޅުވި އެވެ. 

އަމްރު ވިދާޅުވީ ވެރިކަމުގެ ނިޒާމާއި ބެހޭގޮތުން ވާހަކަދެއްކުމުގެ ބަދަލުގައި ރިޔާސީ އިންތިޚާބުން ބަލިވުމަށްފަހު ބޭއްވި އެމްޑީޕީގެ ފުރަތަމަ ގައުމީ މަޖިލީހުގެ ބައްދަލުވުމުގައި ދައްކަން ޖެހޭނީ ދެން އެ ޕާޓީ ކުރިއެރުވުމަށް ކުރައްވާނެ ކަންކަމުގެ ވާހަކައެވެ. އަދި ސިޔާސީ ހަމަޖެހުން ގެނައުމަށް ކުރެވޭނެ ކަންކަމުގެ ވާހަކައެވެ. 

އަމްރުގެ ވާހަކައިގައި ވަނީ އެމްޑީޕީގެ މިއަދުގެ ލީޑަޝިޕަށް ވެސް ގިނަ ފާޑުކިޔުންތަކެއް އަމާޒުކޮށްފަ އެވެ. އެގޮތުން އޭނާ ވިދާޅީ ހަގީގަތުގައި މިހާރު އެމްޑީޕީގައި ހަރުދަނާ ލީޑަޝިޕެއް އޮތްކަމަށް ގަބޫލުފުޅު ނުކުރައްވާ ކަމަށެވެ. 

އެމްޑީޕީގައި އިސްކޮށް ތިއްބެވި ގިނަ ބަޔަކު ވަނީ އެ ޕާޓީން ވަކިވެ ދަ ޑިމޮކްރެޓްސްގެ ނަމުގައި އާ ސިޔާސީ ޕާޓީއެއް އުފައްދާފައެވެ. އެ ޕާޓީން ވަނީ ރިޔާސީ އިންތިޚާބުގައި ވާދަވެސް ކޮށްފައެވެ.