ރާއްޖޭގައި އޮތް އެއްފަސް އެންމެ ބޮޑު އެއް ރަށް ކަމުގައިވާ ލ ގަމުން އެ ރަށުގެ ރައްޔިތުންނަށް ގޯތި ނުދޭ މައްސަލާގައި އެ ރަށުގެ އާންމުން ނިކުމެ ކައުންސިލް ކުރިމަތީގައި އިހުތިޖާޖު ކޮށްފިއެވެ. 

މިއަދު އެ ރަށު ކައުންސިލް ކުރިމަތީގައި ކުރިއަށް ގެންދިޔަ އިހުތިޖާޖުގައި ޖުމުލަ ގޮތެއްގައި ތިން ކަމަކަށް އެ ރަށުގެ ރައްޔިތުން ވަނީ ގޮވާލައިފައެވެ. 

އެއީ 16 އަހަރު ވަންދެން އެ ރަށުގެ ރައްޔިތުންނަށް ގޯތި ނުދީ އޮތް އޮތުން ނިމުމަކަށް ގެނެސް އެ ރަށުގެ ރައްޔިތުންނަށް އަމިއްލަ ފަސްގަނޑުން ގޯތި ލިބޭނެ އިންތިޒާމުތައް ހަމަ ޖައްސައިދިނުމަށާއި، ހުޅުމާލެ ތަރައްގީ ކުރުމުގެ ކުރިން އޭރުގެ ސަރުކާރުން މާލޭގެ ރައްޔިތުންނަށް އެ ރަށުން ދޫކޮށްފައިވާ 521 ގޯއްޗާއި މެދު އަލުން ގޮތެއް ނިންމައި އެ އެ ތަނުން ގަމު ރައްޔިތުންނަށް ގޯތި ދޫކުރުމަށެވެ. މީގެ އިތުރުން ކައުންސިލުން އެންމެ ފަހުން ދިނުމަށް އިއުލާންކޮށް އެންމެ ފަހުގެ މަރުހަލާ އާއި ހަމައިން ހުއްޓުނު ގޯތިތައްކަށް ވީ ނުވީއެއް ހާމަކޮށްދިނުމަށެވެ. 

Advertisement

އެ ރަށުން ވޮއިސް އަށް މައުލޫމާތު ދިން މީހަކު ބުނި ގޮތުގައި މީގެ އަހަރުތަކެއް ކުރިން އެރަށުން މާލޭގެ ރައްޔިތުންނަށް ދޫކުރި 521 ގޯތި އަދިވެސް ހުރީ އެ ހުރިގޮތަށް އިމާރާތެއް ނުކޮށް ކަމުގައެވެ. 

އެރަށުން ވާހަކަ ދެއްކި މީހަކު ބުނި ގޮތުގައި އެ ފަރާތްތަކުން އިހްތިޖާޖު ކުރަން ޖެހުނީ ކައުންސިލުގެ ފަރާތުން އެކަމަށް އެކަށީގެންވާ އެއްބަރުލުމެއް ނުލިބުމުގެ ސަބަބުން ރައްޔިތުންގެ ގެ އިހްސާސްތައް ކައުންސިލަށް އަޑުއިއްވުމަށް ކަމުގައެވެ. 

މައުލޫމާތު ލިބޭ ގޮތުގައި ގޯތީގެ ކަންކަމާ ގުޅޭގޮތުން ރައްޔިތުންނާއި ބައްދަލުކޮށް ވާހަކަދެއްކުމަށްވެސް ކައުންސިލުންވަނީ ބޭނުންނުވެފައެވެ.