ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ އަނބިކަނބަލުން މެޑަމް ފަޒްނާ އަހުމަދާއި، އިންތިޚާބީ ރައީސް ޑރ މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދާއި ދެ ކަނބަލުން ބައްދަލުކުރައްވައިފި އެވެ. 

އެ ދެ ކަނބަލުން ބައްދަލުކުރައްވާފައިވަނީ ރައީސުލްޖުމްހޫރިއްޔާ ހުންނަވާ ރަސްމީ ގެކޮޅު މުލިއާގޭގަ އެވެ. 

މެޑަމް ފަޒުނާ އިންތިޚާބީ ރައީސްގެ އަނބިކަނބަލުންނާއި ބައްދަލުކުރެއްވުން

މި ބައްދަލުވުމުގައި މެޑަފް ފަޒުނާ ވަނީ ރިޔާސީ އިންތިޚާބުގައި ޑރ މުހައްމަދު ހޯއްދެވި ކާމިޔާބީ ފާހަގަކޮށް އެމަނިކުފާނަށް ވަރަށް ހޫނު މަރުހަބާއެއް ދަންނަވާފައެވެ. އަދި އިންތިޚާބީ ރައީސް ހުވާކުރެއްވުމާއެކު ފަސްޓް ލޭޑީގެ ގޮތުގައި ހުންނަވާނެ ސާޖިދާއަށް ވެސް މަރުހަބާ ދަންނަވާފަ އެވެ. 

މެޑަމް ފަޒުނާ އިންތިޚާބީ ރައީސްގެ އަނބިކަނބަލުންނާއި ބައްދަލުކުރެއްވުން

ރިޔާސީ އިންތިޚާބު ޑރ މުއިއްޒު ކާމިޔާބުކުރެއްވީ 129159 ވޯޓާއި އެކުގައެވެ. އެއީ ވޯޓުލީ އާދާބީގެ 54 އިންސައްތަ އެވެ. ރައީސް ޞާލިހަށް ލިބިވަޑައިގަތީ 109868 ވޯޓެވެ. 

ރިޔާސީ އިންތިޚާބަށްފަހު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވެސް ވަނީ އިންތިޚާބީ ރައީސް ޑރ މުއިއްޒަށް މަރުހަބާ ދަންނަވާފަ އެވެ. އެ ދެބޭފުޅުން ވެސް ވަނީ ރައީސް އޮފީހުގައި ބައްދަލުކުރައްވާފަ އެވެ.

އަދި ސަރުކާރު ބަދަލުކުރުމަށް ދޭންޖެހޭ ހުރިހާ އެއްބާރުލުމެއް ދެއްވާނެކަމުގެ ޔަގީންކަން ވެސް ރައީސް ޞާލިހު ވަނީ ދެއްވާފަ އެވެ. 

އޭގެ އިތުރުން ވެރިކަން ބަދަލުވުމުގެ މަރުޙަލާގައި ކުރައްވަންޖެހޭ ކަންކަން، ވީހާވެސް އޮމާންކަމާއެކު ގެންދެވުމަށް މަސައްކަތްޕުޅު ކުރައްވާނެ ކަމަށްވެސް ރައީސް ޞާލިހު ވަނީ ވިދާޅުވެފަ އެވެ. 

އެ އުސޫލުގެ މަތިން އިންތިޤާލީ ރައީސުލްޖުމްހޫރިއްޔާގެ އޮފީސް ހަދައި، އިންތިޤާލީ މަސައްކަތްތައް ކުރިއަށް ގެންދިއުމަށް މިހާރު ވަނީ ކޮމެޓީތައް ވެސް އެކުލަވާލައްވާފަ އެވެ. އަދި އެ ކޮމެޓީތަކުގެ މަސައްކަތްތައް ވަރަށް ބާރަށް ކުރިއަށްދާކަމަށް އިންތިޤާލީ ރައީސް އޮފީހުން ގެންދަވަނީ ހާމަކުރައްވަމުން ނެވެ.