ނަފްސާނީ ދުޅަހެޔޮކަމަކީ، ކޮންމެ ރައްޔިތަކަށްމެ ކަށަވަރުކޮށްދޭންޖެހޭ އަސާސީ ޙައްޤެއް ކަމަށާ، އެމަނިކުފާނުގެ ސަރުކާރުގައި އެ ހައްގުތައް ކަށަވަރުކޮށްދިނުމަށް ސިޔާސަތުތައް ބައްޓަންކުރައްވާނެ ކަމަށް އިންތިޚާބީ ރައީސް ޑރ މުހައްމަދު މުޢިއްޒު ވިދާޅުވެއްޖެއެވެ. 

ނަފްސާނީ ދުޅަހެޔޮކަމުގެ ދުވަހުގެ މުނާޞަބަތުގައި މުޢިއްޒު ކުރެއްވި ޓްވީޓެއްގައި ވިދާޅުވީ، ނަފްސާނީ ދުޅަހެޔޮކަމަކީ، ކޮންމެ ރައްޔިތަކަށްމެ ކަށަވަރުކޮށްދޭންޖެހޭ އަސާސީ ޙައްޤެއް ކަމަށާ، މި އަސާސީ ޙައްޤު ކަށަވަރުކޮށްދެވޭނީ، ހަމަޖެހޭ ދުޅަހެޔޮ ވެއްޓެއް ގާއިމުކުރުމާ އެކު، އެއްވެސް ހުރަހެއް ނެތް، ނަފްސާނީ ފަރުވާއާއި އެހީތެރިކަން ފަހިކޮށްދީގެން ކަމަށެވެ.

"އަޅުގަނޑުގެ ސަރުކާރުގައި މި މަގަށް ސިޔާސަތުތައް ބައްޓަންކުރާނަމެވެ." ޑރ. މުޢިއްޒު ވިދާޅުވިއެެވެ. 

މުޢިއްޒު މިފަދައިން ވިދާޅުވެފައި ވާއިރު، ރިޔާސީ ކެންޕެއިންގެ ތެރެއިން އެމާނިކުފާނު ވަނީ ރާއްޖޭގައި ނަފްސާނީ ބަލިތައް ތަހައްމަލް ކުރަމުންދާ މީހުން ވަރަށް ގިނަ ކަން ފާހަގަކުރައްވައި އެމަނިކުފާނުގެ ސަރުކާރުގައި އެފަދަ މީހުންނަށް ޚާއްސަ ސަމާލުކަމެއް ދެއްވާނެ ކަމަށް ވިދާޅުވެފައެވެ.

އެގޮތުން ނަފްސާނީ ދުޅަހެޔޮކަމާއި ބެހޭ ޤާނޫނެއް އެކުލަވާލައި، ނަފްސާނީ މައްސަލަތަކަށް ފަރުވާ ދިނުމަށް އިންޓަނޭޝަނަލް ހޮސްޕިޓަލެއް ލ. ގަމުގައި އަޅުއްވައި ދެއްވާނެ ކަމަށް ވިދާޅުވެފައެވެ.

ބައިނަލްއަޤްވާމީ ނަފްސާނީ ދުޅަހެޔޮކަމުގެ ދުވަހަކީ ކޮންމެ އަހަރެއްގެވެސް އޮކްޓޯބަރ މަހުގެ 10 ވަނަ ދުވަހެވެ.