ރައްޔިތުންގެ މަޖިލީހަށް ނިކުންނާނީ ޕްރޮގްރެސިވް ކޮންގްރެސް ކޯލިޝަނާއި އެކުގައި ކަމަށް މޯލްޑިވްސް ނެޝަނަލް ޕާޓީ (އެމްއެންޕީން) ހާމަކޮށްފި އެވެ. 

އެމްއެންޕީގެ ގައުމީ ހިންގާ ކައުންސިލްގެ 9 ވަނަ ބައްދަލުވުމުގައި ވާހަކަދައްކަވަމުން އެ ޕާޓީގެ ރައީސް ކާނަލް ރިޓަޔާޑް މުހައްމަދު ނާޒިމް ވިދާޅުވީ ޕީޕީއެމް ޕީއެންސީއާއެކު ގުޅިގެން މަސައްކަތް ކުރުމަށް ހެދިފައިވާ އެއްބަސްވުމަކީ ކުރިއަށް އޮތް 5 އަހަރަށް އެކުލަވާލެވުނު އެއްބަސްވުމެއް ކަމަށެވެ.

މި އެއްބަސްވުމުގައި ކުރިއަށް އޮތް އިންތިޚާބުތަކުގައި ތިން ޕާޓީން އެކުގައި ވާދަކުރުމާއި ގުޅޭގޮތުން ވަކި މާއްދާއެއް ހިމަނާފައިވާނެ ކަމަށް ނާޒިމް ވިދާޅުވި އެވެ. 

Advertisement

އެމްއެންޕީގެ ގައުމީ ހިންގާ ކައުންސިލްގެ 9 ވަނަ ބައްދަލުވުމުގެ ތެރެއިން

މާލޭ މޭޔަރުގެ މަގާމަށް ބޭފުޅަކު އައްޔަނުކުރާ އިންތިޚާބުން ފެށިގެން، 2024 ވަނަ އަހަރުގައި ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބުގައި ވެސް އަދި އެހެނިހެން ހުރިހާ އިންތިޚާބުތަކުގައިވެސް، 3 ޕާޓީއިން ވެސް ކެނޑިޑޭޓުން ވާދަކުރުމަށް ބޭނުންވާނަމަ 3 ޕާޓީގެ މެމްބަރުންގެ މެދުގައި ޕްރައިމަރީ އެއް ބޭއްވޭނެކަމަށާއި، އިންތިޚާބުގައި ވާދަކުރާނީ ޕްރައިމަރީ އިން ހޮވޭ ފަރާތެއްކަމަށް ނާޒިމް ވިދާޅުވިއެވެ.

އޭގެ އިތުރުން ޕްރައިމަރީ ކާމިޔާބުކުރާ ފަރާތްތަކަށް ތިން ޕާޓީން ވެސް އިޚްތިރާމްކުރާނެ ކަމަށާއި، އަދި ކުރިއަށް ދާނީ ޕްރައިމަރީ ކާމިޔާބުކުރާ ފަރާތްތަކާއި އެކުގައި ކަމަށް ނާޒިމް ވިދާޅުވި އެވެ. 

އޭގެ އިތުރުން ނާޒިމް ވިދާޅުވީ ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒަށް ރިޔާސީ އިންތިޚާބުގެ ދެވަނަބުރު ކާމިޔާބުވީ އެމްއެންޕީން ވެސް ގިނަ މަސައްކަތްތަކެއް ކޮށްގެން ކަމަށެވެ.

އަދި ޑރ މުއިއްޒުގެ ސަރުކާރު ދެމެހެއްޓުމަށް ކުރެވެން އޮތް ހުރިހާ މަސައްކަތެއް އެމްއެންޕީން ކުރަމުން ގެންދާނެކަމަށް ނާޒިމް ވަނީ ވިދާޅުވެފަ އެވެ.