އިންތިޚާބީ ރައީސް ޑރ މުހައްމަދު މުޢިއްޒުގެ ކެބިނެޓް އެކަލަވައިލުކީ އެމަނިކުފާނުގެ ޒިންމާއެއް ކަމަށާ، އެކަމާއި ގުޅިގެން، ކުރީގެ ރައީސް ޔާމީން އަބްދުލްގައްޔޫމް ގެ ލިސްޓެއް އެމަނިކުފާނަށް ފޮނުއްވާފައިވާކަން އެނގިފައި ނުވާ ކަމަށް، ޕީއެންސީގެ ޗެއާޕާސަން އަދި ޑިރެކްޓަރު ޖެނެރަލް އޮފް ޓްރާންސިޝަން އަބްދުއްރަހީމް އަބްދުالله (އަދުރޭ) ވިދާޅުވެއްޖެއެވެ. 

ޕީޕީއެމް/ޕީއެންސީގެ ޓިކެޓްގައި ޑރ. މުޢިއްޒު ރިޔާސީ އިންތިހާބަށް ވާދަކުރެއްވީ ރައީސް ޔާމީންގެ އިތުބާރާއި އެކުގައި ކަމަށާ، އެމަނިކުފާނު ކުރި އަރުވާނީ ރައީސް ޔާމީންގެ ތަރައްގީގެ ފިކުރު ކަމަށް މުއިއްޒު ކެންޕެއިންގެ ތެރެއިން ތަކުރާރުކޮށް ވިދާޅުވެފައިވާއިރު، އެމަނިކުފާނުގެ ކެބިނެޓްގައި ހިމެނުމަށް އެދި، ރައީސް ޔާމީން ބައެއް ބޭބޭފުޅުންގެ ނަން ހިމެނޭ ލިސްޓެއް ފޮނުއްވި ކަމުގެ އަޑުތައް ވަނީ ފެތުރިފައެވެ. 

އެކަމާއި ގުޅިގެން، އިންތިޚާބީ ރައީސުލްޖުމްހޫރިއްޔާ ގެ އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއެއް ކުރި ސުވާލަށް ޖަވާބު ދެއްވަމުން އަދުރޭ ވިދާޅުވީ، ކެބިނެޓް އެކުލަވާލުމަކީ ރައީސުލްޖުމްހޫރިއްޔާގެ ޒިންމާއެއްް ކަމަށެވެ.

މީގެ އިތުރުން އަދުރޭ ވިދާޅުވީ، ރައްޔިތުން ވޯޓު ލައިގެން ވެރިކަން ހަވާލު ކުރެއްވީ ޑރ. މުޢިއްޒު އާ ކަމަށާ، އެމަނިކުފާނުގެ ކެބިނެޓް އެކުލަވާލާއިރު ހިމެނޭނެ ބޭފުޅުން ކުރިއާލާ އިއުލާން ކުރައްވާނެ ކަމަށް ދެކެވަޑައި ނުގަންނަވާ ކަމަށެވެ. އަދި ރައީސް ޔާމީންގެ ކެބިނެޓުގައި ހިމެނުނު ބޭފުޅުން މުޢިއްޒުގެ ކެބިނެޓްގައި ހިމެނިވަޑައިގަންނަވާނީ ކިތައް އިންސައްތައިން ކަންވެސް ވިދާޅުވާން ނޭނގޭ ކަމަށް އަދުރޭ ވިދާޅުވިއެެވެ. 

"އަޅުގަނޑަށް އެނގޭހާވެސް އެއްޗަކީ ރައީސް މުޢިއްޒުގެ ކެބިނެޓްގައި ހިމެނިވަޑައިގަންނަވާނީ އެމަނިކުފާނު އެދޭ ވަރަށް މަސައްކަތް ކުރުމުގެ ގާބިލް ކަމާއި ހުނަރާއި ހިތްވަރު ހުރި ބޭފުޅުން ކަން." އަބްދުއްރަހީމް ވިދާޅުވިއެެވެ. 

އަދުރޭ މިފަދައިން ވިދާޅުވެފައި ވާއިރު، ވެރިކަމަށް އިންތިޚާބުވެވަޑައިގެންނެވި ފަހުން މުޢިއްޒު ބޭއްވެވި އެންމެ ފުރަތަަމަ ބައްދަލުމުގައި ވެސް އެމަނިކުފާނު ވަނީ ރައްޔިތުން ވެރިކަމަށް އިންތިޚާބު ކުރެއްވީ އެމަނިކުފާނު ކަމަށާ، އަދި ވެރިކަން ކުރައްވާނީ ވެސް އެމަނިކުފާނު ކަމަށް ވިދާޅުވެފައެވެ. އަދި ރައްޔިތުން ފިޔަވައި އެހެން މީހެއްގެ އެމަނިކުފާނުގެ މައްޗަށް ނުހިނގާނެ ކަމަށްވެސް މުޢިއްޒު އެ ރޭ ވިދާޅުވި އެވެ.