ރާއްޖޭގެ ބޭނުން ކުރެވޭ ރިޒާވް މިހާރު ދަނީ އެއްކޮށް ހުސްވަމުން ކަމަށް ރައްޔިތުންގެ މަޖިލިހުގެ މާވަށު ދާއިރާގެ މެމްބަރު އަދި އިންތިހާބީ ރައީސް ޑރ. މުހައްމަދު މުއިއްޒުގެ ފަރާތްޕުޅުން އަންނަ އަހަރުގެ ބަޖެޓު އެކުލަވާލުމަށް ހެދި ކޮމިޓީގެ ޗެއާކަން ކުރައްވަމުންދާ މުހައްމަދު ސަޢީދު ވިދާޅުވެއްޖެއެވެ.
ސަޢީދު ރޭ ކުރެއްވި ޓްވީޓެއްގައި ވިދާޅުވީ ނިމިގެން މިދާ 19 ވަނަ ރައްޔިތުންގެ މަޖިލީހުގައި ވަރަށް ބޮޑަށް ދައުލަތުގެ ރިޒާވުގެ ވާހަކަދައްކަމުންދިޔަ ކަމަށެވެ.
އަދި ރާއްޖޭގައި ބޭނުން ކުރެވޭ ރިޒާވް 68 މިލިއަން ޑޮލަރަށް ވެއްޓުނު އިރުވެސް ސަރުކާރުންނާއި އެމްއެމްއޭއިން ދިޔައީ އެކަން ސިއްރު ކުރަމުން ކަމަށް ވެސް ސައީދު ވިދާޅުވިއެވެ.
"ރާއްޖޭގެ ބޭނުންކުރެވޭ ރިޒާވް މިހާރު އެއްކޮށް ހުސްވަނީ!" ކުރީގެ ރައީސް ޔާމީން އަބްދުލްގައްޔޫމް ގެ ވެރިކަމުގައި އިކޮނަމިކް މިނިސްޓަރުކަންވެސް ކުރައްވާފައިވާ ސަޢީދު ވިދާޅުވި އެވެ.
ސަޢީދު އިތުރަށް ވިދާޅުވީ، ރާއްޖެ މިހާ ނުރައްކާތެރި ޙާލަތަކަށް ވައްޓާލާފައިވަނީ ސީދާ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކާރުން ކަމަށެވެ.
އެމްއެމްއޭ އިން އެންމެ ފަހުން އާންމުކޮށްފައިވާ ތަފާސް ހިސާބުތައް ދައްކާ ގޮތުގައި ދައުލަތުގެ ޔޫޒަބަލް ރިޒާވްގައި ހުރި އަދަދު 148 މިލިއަން ޑޮލަރަށް ވަނީ ދަށަށް ގޮސްފައެވެ.
ޔޫޒަބަލް ރިޒާވަކީ ރަސްމީ ރިޒާވުން ކުރު މުއްދަތުގައި ދައްކަންޖެހޭ ދަރަނި އުނި ކުރުމުން ބާކީ އޮންނަ އަދަދެވެ. ޔޫޒަބަލް ރިޒާވުން ދައްކައިދެނީ ބޭރު ފައިސާގެ އެކި މުއާމަލާތްތަކަށް ވަގުތުން ވަގުތަށް ބޭނުންކުރުމަށް ހުރި ފައިސާގެ އަދަދެވެ.
Advertisement
This content is created and paid for by advertisers and does not involve Voice Journalists
