އިންތިޚާބީ ރައީސް ޑރ މުހައްމަދު މުޢިއްޒުގެ ވެރިކަމާއި ތޮޅެން ނުކުންނަ ބަޔަކާ ދެކޮޅަށް ހަނގުރާމަ އިއުލާން ކުރައްވާނެ ކަމަށް ހޯރަފުށީ ދާއިރާގެ ކުރީގެ މެންބަރު މުހައްމަދު އިސްމާއިލް ވިދާޅުވެއްޖެއެވެ. 

މުހައްމަދު އިސްމާއިލް މިފަދައިން ވިދާޅުވެފައި ވަނީ އޭނާ ރޭ ކުރެއްވި ޓްވީޓެއްގައެވެ. 

ޕީޕީއެމްގެ ހަރަކާތު ކޮމިޓީގެ ޗެއާގެ މަގާމުގައިވެސް ހުންނެވި މުހައްމަދު އިސްމާއިލް މިފަދައިން ވިދާޅުވެފައިވާއިރު، ޑރ. މުޢިއްޒު ވެރިކަމަށް އިންތިޚާބު ކުރައްވަން، އެންމެ ގަދަޔަށް ކެންޕެއިން ކުރެއްވި އެއް ބޭފުޅަކީ އޭނާ އެެވެ. 

އަދި އޭގެ އިތުރުން، މުހައްމަދު އިސްމާއިލް އަކީ ޕީޕީއެމް އިދިކޮޅުގައި އޮވެގެން ހިންގާފައިވާ ހުރިހާ މަގުމަތީ ހަރަކާތެއްވެސް އިންތިޒާމް ކުރައްވައި، އެކަންކަން ލީޑް ކުރެއްވި އެކެވެ. 

އެގޮތުން އިންޑިއާ އައުޓް ހަރަކާތާއި، ކުރީގެ ރައީސް އަދި އިދިކޮޅު ލީޑަރ ރައީސް ޔާމީން އަބްދުލްގައްޔޫމް މިނިވަން ކުރުމަށް ގޮވާލައި ހިންގާފައިވާ ހުރިހާ ހަރަކާތެއްގައި ވެސް އޭނާ ވަނީ އިސްކޮށް ހަރަކާތްތެރިވެފައެވެ.