ޤައުމީ އެމްބިއުލާންސްގެ ޚިދުމަތް ހެލްތު މިނިސްޓަރު އަހުމަދު ނަސީމު ރަސްމީކޮށް ފައްޓަވައިދެއްވައިފި އެވެ. 

އެ ޚިދުމަތް ފައްޓަވާދެއްވުމަށް ޖުމްހޫރީ މައިދާނުގައި ބޭއްވި ރަސްމިއްޔާތުގައި ވާހަކަދައްކަވަމުން ހެލްތު މިނިސްޓަރު ނަސީމު ވަނީ ޤައުމީ އެމްބިއުލާސްގެ ޚިދުމަތަކީ ސިއްޙީ ނިޒާމު ހަރުދަނާކުރުމާއި ރައްޔިތުންގެ ދުޅަހެޔިކަން ކަށަވަރުކުރުމަށް މުހިންމު ޚިދުމަތެއްކަން ފާހަގަކުރައްވާފަ އެވެ. 

ޤައުމީ އެމްބިއުލާންސްގެ ޚިދުމަތް ރަސްމީކޮށް ފަށާފައިވާއިރު، އެންމެ ފުރަތަމަ މި ޚިދުމަތް ފަށާފައިވަނީ މާލެ ސަރަހައްދުގައެވެ. އަދި މި ޚިދުމަތް ފޯރުކޮށްދިނުމަށްޓަކައި 24 ގަޑިއިރުގެ ކޯލް ސެންޓަރެއް ވަނީ ގާއިމްކުރައްވާފަ އެވެ. އަދި މި ޚިދުމަތް ފޯރުކޮށްދިނުމަށްޓަކައި މާލެ ސަރަހައްދުގައި ހިމެނޭ ސިއްހީ ފަރުވާދޭ ހުރިހާ ތަންތަނެއް ގުޅިގެން މަސައްކަތް ކުރެވޭނެ ގޮތަށް ވަނީ ހަމަޖައްސާފަ އެވެ. 

Advertisement

ސަރުކާރުން ގެނެސްފައިވާ ޕެރަމެޑިކް އެމްބިއުލާންސެއް

މާލޭގައި ފެށި އެމްބިއުލާންސްގެ ޚިދުމަތް ހޯއްދެވުމަށް 100 އަށް ގުޅުއްވުމުން ޕެރަމެޑިކާއެކު އެކްސިޑެންޓު ހިނގާފައިވާ ތަނަށް ނުވަތަ ބަލި މީހާ އޮތް ސަރަހައްދަށް ގޮސް ހޮސްޕިޓަލަށް ގެންދިއުމުގެ ކުރިން ބަލިމީހާއަށް ބޭނުންވާ ކުއްލި ފަރުވާއާއި ބަލިމީހާ ސްޓެބަލައިޒް ކުރުމުގެ މަސައްކަތް ކުރާނެ އެވެ. 

އޭގެ އިތުރުން މި ޚިދުމަތުގެ ތެރެއިން ބަލި މީހާ އެންމެ ކައިރީގައި ހުރި ހޮސްޕިޓަލަކަށް ގެންދެވޭއިރު އެ ބަލިމީހާގެ މައުލޫމާތު ލިބިފައިވާ ޓީމެއް ޕޭޝަންޓަށް އެޓެންޑުވުމަށް ތައްޔާރަށް އޮންނާނެކަމަށް ހެލްތު މިނިސްޓަރު ނަސީމު ވަނީ ވިދާޅުވެފަ އެވެ. 

މާލެ ސަރަހައްދުގައި ރަސްމީކޮށް ޤައުމީ އެމްބިއުލާންސްގެ ޚިދުމަތް މިއަދު ފެށި ނަމަވެސް، ކުރިއަށް އޮތް ތަނުގައި މި ޚިދުމަތް އަތޮޅުތެރެއަށް ފުޅާކުރެއްވުމަށް ނިންމަވާފައިވާކަމަށް ހެލްތު މިނިސްޓަރު ނަސީމު ވަނީ ވިދާޅުވެފަ އެވެ. 

އޭގެ އިތުރުން ކޯވިޑް ނަވާރައިގެ ބަލިމަޑުކަމުގެ ތެރޭގައި ވެސް ސަރުކާރުން ވަނީ އެމްބިއުލާންސްގެ ޚިދުމަތް ހެލްތު އެމަޖެންސީ އޮޕަރޭޝަން ސެންޓަރުގެ ދަށުން ފޯރުކޮށްދީފަ އެވެ. އަދި އެ ޚިދުމަތް ފޯރުކޮށްދިނުމަށް ޕެރަމެޑިކް ޓީމުތަކެއް އެކުލަވާލާ ހަރަކާތްތެރިވަމުން ގޮސްފައިވާކަން ވެސް ފާހަގަކޮށްލެވެއެވެ.