ޤަވައިދާއި ޚިލާފަށް ރާއްޖޭގައި ތިބި އިންޑިއާ ސިފައިން އަނބުރާ ފޮނުވާލުމުގެ މަސައްކަތާއި ގުޅޭގޮތުން އިންޑިއާގެ ސަފީރުގެ ފަރާތްޕުޅުން އުންމީދީ ޖަވާބުތަކެއް ލިބިފައިވާކަމަށް އިންތިގާލީ ތަރުޖަމާނު މުހައްމަދު ފިރުޒުލް ވިދާޅުވެއްޖެ އެވެ. 

ފިރުޒުލް މިފަދައިން ވިދާޅުވެފައިވަނީ މިއަދު އިންތިގާލީ ރައީސުލްޖުމްހޫރިއްޔާގެ އޮފީހުން ބޭއްވި ޕްރެސް ކޮންފަރެންސްގައި އިންޑިއާ ސިފައިން މައްސަލަ ޙައްލުކުރުމުގެ މަސައްކަތް ގޮށްފައިވާ ހިސާބާއި ގުޅޭގޮތުން ނޫސްވެރިއަކު ކުރި ސުވާލަށް ޖަވާބުދެއްވަމުން ނެވެ. 

ފިރުޒުލް ވިދާޅުވީ އިންޑިއާ ސިފައިން އަނބުރާ ފޮނުވާލުމާއި، ގެއްލިފައިވާ ދިވެހިރާއްޖޭގެ ކަނޑުގެ ސަރަހައްދު ހޯދުމަށް ކުރެވެން ހުރި ކަންކަން އިންތިގާލީ މަރުހަލާގައިވެސް ބަލަމުންދާ ކަމަށެވެ.

މިހާރު ކުރިއަށް ދަނީ ހާލަތު ދެނެގަތުމުގެ މަސައްކަތްތައް ކަމަށާއި، އަދި އެކަންކަމާއި ގުޅޭ މައުލޫމާތުތައް ވެސް މިހާރު ކޮންމެވެސް މިންވަރަކަށް ލިބިފައިވާކަން ފިރުޒުލް ފާހަގަކުރެއްވި އެވެ. 

އެއާއެކު އޭނާ ވިދާޅުވީ އިންތިގާލީ މަރުހަލާގައި ވެސް އިންޑިއާ ސިފައިން އަނބުރާ ފޮނުވާލުމާއި ގުޅޭ ބައެއް މަސައްކަތްތައް ކުރައްވަމުން ގެންދަވާ ކަމަށެވެ.

އެގޮތުން އިންތިޚާބީ ރައީސުލްޖުމްހޫރިއްޔާގެ އަރިހަށް އިންޑިއާ ސަފީރު ކުރެއްވި ޒިޔާރަތުގައި، އެކަމާއި ގުޅޭ ވާހަކަތައް ދައްކަވާފައިވާ ކަމަށާއި، އަދި ސަރީފުގެ ފަރާތުން ވެސް އެ މައްސަލަ ޙައްލުކުރެވިދާނެ ކަމުގެ އުންމީދީ ޖަވާބުތަކެއް ލިބިގެން ގޮސްފައިވާކަމަށް ފިރުޒުލް ވިދާޅުވި އެވެ. 

އެކަން ކަން ފާހަގަކުރައްވާ ފިރުޒުލް ވިދާޅުވީ އިންޑިއާ ސިފައިންގެ މައްސަލަ ކާމިޔާބުކަމާއެކު ޚައްލުކުރެވޭނެ ކަމުގެ އުންމީދު އޮތްކަމަށެވެ. އަދި އެކަންކަމުގެ ތަފްސީލުތައްވެސް މީޑިއާއާއި ހިއްސާކުރަމުން ގެންދާނެ ކަމަށެވެ. 

އިންތިޚާބީ ރައީސް ޑރ މުހައްމަދު މުއިއްޒު ގެންދަވަނީ އިންޑިއާ ސިފައިން ރާއްޖެއިން ފޮނުވާލުމުގެ މަސައްކަތް ކުރައްވާނެކަމުގެ ޔަގީންކަން ދެއްވަމުންނެވެ.

އެމަނިކުފާނު ވިދާޅުވީ އިންޑިއާ ސިފައިން ރާއްޖޭގައި ތިބެން ރައްޔިތުން ބޭނުން ނުވާކަމަށާއި، ރައްޔިތުންގެ ނިންމުމާއި އެއްގޮތަށް ގައުމުގެ މިނިވަންކަމާއި އިސްތިގުލާލު ކަށަވަރުކުރުމުގެ މަސައްކަތްޕުޅު ޚާއްސަ އިސްކަމެއް ދެއްވައިގެން ކުރައްވަމުން ގެންދަވާނެ ކަމަށެވެ.