ދައުރު ހަމަ ނުކުރާ ރައީސުންނަށް ދެމުންދާ އިނާޔަތްތައް ކަނޑާލަންޖެހޭ ކަމަށް ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އިކްރާމް ހަސަން ވިދާޅުވެއްޖެ އެވެ. 

އިކްރާމް މިހެން ވިދާޅުވީ އޭނާ ކުރެއްވި ޓްވީޓެއްގައެވެ. 

އިކްރާމްގެ އެ ޓުވީޓު އަމާޒުކުރައްވާފައި ވަނީ ކުރީގެ  ރައީސް މުހައްމަދު ނަޝީދަށެވެ. އެގޮތުން، ނަޝީދަކީ ވެރިކަމުގެ ފަސް އަހަރުގެ ދައުރު ހަމަނުކޮށް ރައީސްކަމުން އިސްތިއުފާ ދެއްވާފައި ހުންނެވި ބޭފުޅަކަށް ވާއިރު  އެމަނިކުފާނަށްވެސް ސަރުކާރުން އަންނަނީ ރައީސުލްޖުމްހޫރިއްޔާ ކަމުގައި މަގާމު ފުރުއްވީތީ ދޭ ބޮޑު އިނާޔަތް ދެމުންނެވެ. 

Advertisement

އެހެންކަމުން އިކްރާމް ވަނީ ދައުރު ހަމަނުވާ ހުރިހާ ރައީސުންގެ އިނާޔަތް ކަނޑާލުމަށް ގޮވާލާފައެވެ.

ނަޝީދު 2008 ގައި ރައީސް ކަމަށް ވަޑައިގެންނެވުމަށްފަހު، ދައުރުގެ މެދުތެރެއިން އިސްތިއުފާ ދެއްވީ ފެބްރުއަރީ 7، 2012 ގައެވެ. އެ ދުވަހު ރައީސްގެ އޮފީހުގައި އިސްތިއުފާ ދެއްވާކަން އިއުލާންކުރެއްވުމަށް ފަހު، ފަހުން ވިދާޅުވެފައި ވަނީ އިސްތިއުފާ ދެއްވީ ބަޔަކު "ބޮލުގައި ބަޑި ޖައްސައިގެން" މަޖުބޫރުކޮށްގެން ކަމަށެވެ.