މިހާރު ކުރިއަށްދާ ރާ އަތޮޅު ކައުންސިލްގެ ފުރަތަމަ އަންހެން ހޭންޑްބޯލް މުބާރާތުގެ ދެވަަނަ މެޗުގައި މިއަދު ހަވީރު ހުޅުދުއްފާރާއި ދެކޮޅަށް ކުޅުނު މެޗު ވާދަވެރި ކުޅުމަކަށްފަހު 5-7 ގެ ނަތީޖާއަކުން އަނގޮޅިތީމުން  ކާމިޔާބުކޮށްފިއެވެ.

ރާ އަތޮޅު ކައުންސިލްގެ ފަރާތުން އިންތިޒާމްކޮށްގެން 2023 ނޮވެމްބަރު 04 ން 08 އަށް ކުރިއަށް ގެންދާ މި މުބާރާތުގައި މިއަހަރު ޖުމުލަ ހަތަރު ޓީމެއް ބައިވެރިވެފައިވާ އިރު، މުބާރާތުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ހަތަރު ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާ އެއްފަހަރު ކުޅެ އެންމެ ގިނަ ޕޮއިންޓް ހޯދާ ދެޓީމު މުބާރާތުގެ ފައިނަލްގައި ކުޅޭ ގޮތަށެވެ.

ރާ އުނގޫފާރު ފުޓްސަލް ދަނޑުގައި ކުޅުނު މި މެޗުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު, މި މެޗުގައި ފުރަތަަމަ ލަނޑުޖަހައި ކުރިހޯދީ އަނގޮޅިތީމުން ނެވެ. އަދި މިހާފުގައި އެޓީމުން ތިން ލަނޑު ކާމިޔާބުކުރިއިރު، ހުޅުދުއްފާރުން ވެސް ވަނީ ދެލަނޑު ކާމިޔާބުކޮށްފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 3-2 ގެ ނަތީޖާއަކުން އަނގޮޅިތީމުން ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު މިހާފުގައި އަނގޮޅިތީމުން ވަނީ އިތުރު ހަތަރު ލަނޑު ކާމިޔާބުކުރިއިރު ހުޅުދުއްފާރުން ވެސް ވަނީ އިތުރު ތިން ލަނޑު ކާމިޔާބުކޮށްފައެވެ. މިއާއެކު މެޗުގެ ކުޅުން ނިމިގެންދިޔައީ 7-5 ގެ ނަތީޖާއަކުން އަނގޮޅިތީމުން ކުރީގައި އޮވެގެންނެވެ. އަދި މިމެޗުގެ މޮޅު ކުޅުންތެރިޔަކަށް ހޮވުނީ ފާތިމަތު ރިޝްމާ އެވެ.

މިމުބާރާތުގައި މިއަދުގެ ހަވީރު ކުޅެވުނު ފުރަތަމަ މެޗުގައި އިނގުރައިދޫ އިން ވަނީ 5-3 ގެ ނަތީޖާއަކުން މަޑުއްވަރީ އަތުން މޮޅުވެފައެވެ. އަދި މިހާރު ކޮންމެ ޓީމަކުން ވެސް އެއްމެޗު ކުޅެފައިވާއިރު ތިން ޕޮއިންޓާއެކު ލަނޑުގެ ތަފާތުން އެއްވަނާގައި އޮތީ އަނގޮޅިތީމުން ދެވަނައިގައި ތިން ޕޮއިންޓާއެކު އިނގުރައިދޫ އޮތްއިރު، ހުޅުދުއްފާރާއި މަޑުއްވަރީއަށް އަދި ޕޮއިންޓެއް ނުލިބެއެވެ.