މޯލްޑިވްސް މީޑިއާ ކައުންސިލަށް އަނބުރާ ލިބެންޖެހޭ 6 ލައްކައަށް ވުރެ ގިނަ ފައިސާ ނުލިބިވާކަމަށް އެ ކައުންސިލްގެ 2022 ވަނަ އަހަރުގެ އޮޑިޓް ރިޕޯޓުން ހާމަވެއްޖެ އެވެ.

އެ ފައިސާ އަކީ މޯލްޑިވްސް މީޑިއާ ކައުންސިލްގެ މެމްބަރުންނަށް ލިވިން އެލަވަންސްގެ ގޮތުގައި ގޮތުގައި ދޫކުރި ފައިސާގެ ތެރެއިން އަނބުރާ ހޯދަން ޖެހޭ ފައިސާއެވެ. 

މޯލްޑިވްސް މީޑިއާ ކައުންސިލްގެ 2022 ވަނަ އޯޑިޓް ރިޕޯޓުގައި ވާ ގޮތުން އެ ކައުންސިލްގެ ފުރަތަމަ ދައުރުގައި ތިއްބެވި 15 މެމްބަރަކަށް ލިވިން އެލަވަންސްގެ ގޮތުގައި އެއްމިލިއަން ބާރަ ހާހަށްވުރެ ގިނަ ރުފިޔާ ވަނީ ދޫކޮށްފައެވެ. އަދި އެއީ މާލިއްޔަތު ގާނޫނާއި ޚިލާފަށް ދޫކޮށްފައިވާ ފައިސާކަން އޮޑިޓާ ޖެނެރަލް ހުސެއިން ނިޔާޒު ސޮއިކުރައްވާ ނެރުއްވި ރިޕޯޓުގައި ފާހަގަކޮށްފައި ވެއެވެ. 

Advertisement

އެގޮތުން އެމްއެމްސީގެ 10 މެމްބަރުންގެ އަތުން އެމްއެމްސީއަށް ލިބެންޖެހޭ ހަލައްކަ ހަތްދިހަފަސްހާސް ރުފިޔާ ނުލިބި ހުރިކަން އޮޑިޓަށް ވަނީ ފާހަގަކުރެވިފައެވެ. އަދި އެ ފައިސާ ހޯދުމަށް ފިނޭންސް މިނިސްޓްރީން ކޯޓަށް ދިއުމުން ސުޕްރިމް ކޯޓުން ވަނީ މި މައްސަލަ ދައުލަތާއި އެއްކޮޅަށް ނިންމަވާ އެއީ ދައުލަތަށް ލިބެންޖެހޭ ފައިސާކަމަށް ކަނޑައަޅާފަ އެވެ. 

އެހެން ނަމަވެސް ސުޕްރިމް ކޯޓުގެ އެ ހުކުމަށް ފަހުވެސް ޝަރީއަތުން ކަނޑައަޅާފައިވާ ގޮތަށް އެ ފައިސާ އަނބުރާ ދައްކާފައެއް ނުވެއެވެ. 

ދައުލަތުގެ މާލިއްޔަތު ޤާނޫނުގައި ދައުލަތުގެ އޮފީސްތަކަށް ލިބެންޖެހޭ ފައިސާ ހޯދުމަށް އަމަލުކުރަން ޖެހޭ ގޮތް ބަޔާންކޮށްފައިވާއިރު، ކަނޑައެޅިފައިވާ މުއްދަތުގެ ތެރޭގައި ފައިސާ ނުލިބިއްޖެނަމަ އިތުރު މުހުލަތުތަކެއް ދިނުމަށްފަހު ޝަރީއަތް މެދުވެރިކޮށް ފައިސާ ހޯދުމަށް އަންގާފައިވެއެވެ. 

އެހެން ނަމަވެސް މީޑިއާ ކައުންސިލަށް ލިބެންޖެހޭ ހަލައްކަ ހަތްދިހަފަސްހާސް ރުފިޔާ ޝަރީއަތް މެދުވެރިކޮށް ހޯދާފައެއް ނުވެއެވެ.