މޯލްޑިވްސް ނެޝަނަލް ޕާޓީ (އެމްއެންޕީ)ގެ ނާއިބު ރައީސާ މިރްފަތު އިސްމާޢީލް ޝަފީގު އެ ޕާޓީން ވަކިވެވަޑައިގެންފި އެވެ. 

މިކަމާއި ގުޅިގެން 'ވޮއިސް' އަށް މަޢުލޫމާތު ދެއްވަމުން މިރްފަތު ވިދާޅުވީ، މީގެ މަހެއްހާ ދުވަސްކުރިން އޭނާ އެޕާޓީން ވަކިވެވަޑައިގެންފައިވާ ކަމަށެވެ. އަދި ޕާޓީ ދޫކުރެއްވީ އެއްވެސް މައްސަލައެއް ޖެހިގެން ނޫން ކަމަށާ، އެކަން ކުރެއްވީ އަމިއްލަ ސަބަބު ތަކަކަށްޓަކައި ކަމަށެވެ. 

މިރްފަތު އިތުރަށް ވިދާޅުވީ އޭނާ މިވަގުތު ހުންނެވީ އެއްވެސް ޕާޓީއެއްގައި ނޫން ކަމަށާ، އެހެން ނަމަވެސް ކުރިއަށް އޮތް ތަނުގައި ޕީޕީއެމް ނުވަތަ ޕީއެންސީން ފެނިދާނެ ކަމުގެ އިޝާރާތެއް ވަނީ ކުރައްވާފައެވެ. 

Advertisement

އެގޮތުން، ކުރިއަށް އޮތް މަޖިލީސް އިންތިޚާބުގައި ޕީޕީއެމް/ޕީއެންސީ ޓިކެޓްގައި ވާދަކުރެއްވުމުގެ ވިސްނުން އޭނާގެ ހުންނެވި އިރު، މުޢިއްޒުގެ ސަރުކާރުގެ މަގާމަކުންވެސް އޭނާ ފެނިދާނެކަމުގެ އިޝާރާތެއް ވަނީ ކުރައްވާފައެވެ. 

ޕީޕީއެމް/ޕީއެންސީގެ އައު ސަރުކާރުގެ ތެރެއިން ނުވަތަ މަޖިލީހުގެ ތެރެއިންވެސް އެ ކޯލިޝަން ތަމްސީލް ކުރައްވަން މިރްފަތުގެ ޝައުގުވެރިކަން ހުންނެވިއިރު، ނިމިގެންދިޔަ ރިޔާސީ އިންތިހާބުގެ ދެވަނަ ބުރުގައި މިރްފަތު ހުންނެވި ޕާޓީ، އެމްއެންޕީން ކޯލިޝަން ހަދާފައިވަނީ ވެސް ޕީޕީއެމް/ޕީއެންސީއާ އެކުގައިކަން ފާހަގަކޮށްލަންޖެހެއެވެ.