ކޮންމެ އަހަރެއްގެވެސް އިރުގައި މޫސުމާ ދިމާކޮށް ހިޖުރަ ކުރާ ދޫނީގެ އާއިލާތަކުގެ ގިނަ އަދަދެއްގެ ދޫނިތަކުގެ މަންޒިލަކަށް ރާއްޖޭގެ ފެހިކަންގަދަ ރަށްތަކާއި ޤުދުރަތީ މުއްސަނދިކަމުން ފުރިފައިވާ ކުޅިތައް ވެގެންދެއެވެ. 

އެގޮތުން މިއަހަރުގެ އިރުވައި މޫސުމާއި ދިމާކޮށް ހދ ކުޅުދުއްފުށީ ޗަކަ ކިޅިއަށް ޖައްސައިތިބި ގުޑުގުޑާ ދޫނިތަކާއެކު މިއަހަރުގެ ވެސް ހިޖުރަ ކުރާ ދޫނިތަކުގެ އުފާވެރި މޫސުމް ފެށުނީކަމަށް ބެލެވެއެވެ. 

ކުރިއަށް ދެން އޮތީ އިރުވައި މޫސުމެވެ. ފިނި މޫސުމާ ދިމާކޮށް އެފްރިކާ ބައްރަށް ދަތުރުކުރާ ބައެއް ދޫނިތަކަށް ބެހިގެން, "ސްޓޮޕްއޯވަރ" މަންޒިލެއްގެ ގޮތުގައި ރާއްޖެ ޚިޔާރުކުރެއެވެ.

މޫސުމީ ދޫނިތަކާއި އަދި މިދުވަސްވަރު ހިޖުރަކުރާ ދޮންދޫނި (ހެއިނަކަތް ދޫނި)ތަކުގެ މޫސުމީ ދަތުރަކީ (ކާބަފައިންގެ ޒަމާނުއްސުރެ) އިރުވައި މޫސުން ފެށެން އުޅޭކަމުގެ އަލާމާތްކަމަށް ދިވެހިން ފާހަގަކުރާކަމެކެވެ.

މިދުވަސްވަރު އިންޓަރ-ޓްރޮޕިކަލް ކޮންވަރޖެންސް ޒޯން (އައި.ޓީ.ސީ.ޒެޑް)ގެ އުތުރުން އިރަށް ވައިގެ މިސްރާބުހުރުމުން, އަރަބި ކަނޑު ހުރަސްކޮށް ދަތުރުކުރަން މިފަދަ މޫސުމީ ދޫނިތަކަށް ފަސޭހަވެގެން ދެއެވެ. އަދި މިދަތުރުގައި ބައެއް ބާވަތުގެ ދޫނީގެ ބައިގަނޑުތަކަށް މަގުއޮޅިގެން ނުވަތަ ބެހިގެން ވަރަށް ގިނަ ފަހަރަށް ރާއްޖެ ހުރަސްކޮށް ދެއެވެ. 

އެހެނަސް ފާހަގަކޮށްލަންޖެހޭ ހިތާމަހުރި އެއްކަމަކީ، މިފަދައިން ރާއްޖެ ޒިޔާރަތްކުރާ ދޫނިތައް ހިފައި އެތަކެއްޗަށް ހާނިކަ ކުރުމުގެ އާދަ މަދުން ނަމަވެސް އަދިވެސް މިދިވެހި މުޖުތަމަޢުގައި އޮތްކަމެވެ. 

މަޅިފައްޗާއ ދަންތުރަތައްފަދަ އާލާތްތައް ބޭނުންކޮށްގެން، ރާއްޖެއަށް ހިޖުރަކުރާ މޫސުމީ ދޫނި ހިފައިގެން ކޮށިކޮއްޓަށްލައި ބަންދުކޮށްގެން ގެންގުޅުމަކީ ދިވެހިން ކުރިން ކުރަމުން އައިކަމެކެވެ. ނަމަވެސް މިފަދަ ދޫނިތަކަށް ޚާއްސަކުރެވިގެން ގަވައިދެއްހެދި، ރާއްޖެއަށް ހިޖުރަކުރާ ހުރިހާ ދޫނިވެސް މިހާރު ވަނީ ޤާނޫނީގޮތުން ހިމާޔަތްކުރެވިފައެވެ.

މިގޮތުން ރާއްޖެއަށް ޒިޔާރަތްކުރާ ހުރިހާ ދޫންޏަކީ "ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނު" (ޤާނޫނު ނަންބަރު: 93/4)ގެ ދަށުން ހެދިފައިވާ "ޤުދުރަތީ ގޮތުގައި ނުވަތަ ޠަބީޢީ ގޮތުގައި ޙިމާޔަތްކޮށް ރައްކައުތެރިކުރާ ދިރޭ ތަކެއްޗާބެހޭ ގަވާއިދު" (ގަވާއިދު ނަންބަރު: 2021/R-25)ގެ ދަށުން ހިމާޔަތްކުރެވިފައިވާ ދޫނިތަކެކެވެ. އަދި މިފަދަ ދޫނިތައް ހިފައި ހައްޔަރުކޮށް، އެއްވެސް ގޯނާއެއް ކުރުމަކީ ޤާނޫނީގޮތުން ކުށެކެވެ. އަދި މިގަވައިދުގެ ދަށުން ޖޫރިމަނާކުރެވޭނެ ކުށެކެވެ.