ބަންގުލަދޭޝްގެ ރައްޔިތެއް ކަމަށްވާ އަލަމްގީރުއާއެކު އެއްޖިންސުން ގުޅުން ހިންގި ކަމަށް އިއުތިރާފުވެފައިވާ ނާޒިމް ސައްތާރުގެ މައްޗަށް ކްރިމިނަލް ކޯޓުން ކުރި ހުކުމް ހައިކޯޓުގައި އިސްތިއުނާފުކޮށްފައި ވަނިކޮށް ޕްރޮސެކިއުޓާ ޖެނެރަލްގެ އޮފީހުން އެދިގެން އެ މައްސަލަ ހައި ކޯޓުން ބާތިލު ކޮށްފި އެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކޮށްކޮ ނާޒިމް އާއި އަލަމްގިރި އާއި އެކު އެއްޖިންސުން ގުޅުން ހިންގާ މަންޒަރު ފެންނަ ވީޑިއޯއެއް އާންމުވި މައްސަލައިގައި އޭނާ ހައްޔަރު ކޮށްފައިވަނީ މިދިޔަ އަހަރުގެ ޖުލައި މަހުގެ 28 ވަނަ ދުވަހުއެވެ.

އެ މައްސަލާގައި ނާޒިމްއަށް ހުކުމް ކުރަން އޮތް ދުވަހު (15 ސެޕްޓެމްބަރު 2022) ކުށަށް އިއުތިރާފްވެ މާފަށް އެދިފައިވާ އިރު، ކްރިމިނަލް ކޯޓުން އޭނާއަށް އިއްވީ ތިން މަހާއި 26 ދުވަހުގެ ގޭ ބަންދުގެ އަދަބެކެވެ.

Advertisement

ކްރިމިނަލް ކޯޓުން ނާޒިމްގެ މައްޗަށް ކަނޑައެޅި އަދަބު މާ ކުޑަ ވުމުން އެ އަދަބުގެބައި ހައިކޯޓުގައި އިސްތިއުނާފް ކުރީ ޕްރޮސެކިއުޓަރ ޖެނެރެލްގެ އޮފީސް (ޕީޖީ) އިންނެވެ. 

އެހެން ނަމަވެސް، އެ މައްސަލަ އާއި ގުޅިގެން ހައިކޯޓުން އިއްޔެ ކުރި ހުކުމުގައި މައްސަލަ ބެއްލެވި ތިން ފަނޑިޔާރުންގެ އިއްތިފާގުން ވަނީ މައްސަލަ ބާތިލް ކޮށްފައެވެ. 

އެގޮތަށް ނިންމި ސަބަބެއް ކަމަށް ބުނެފައި ވަނީ، ނާޒިމް ހުކުމް ތަންފީޒުކޮށް މިހާރު ނިންމާފައި ވާތީ އެ މައްސަލަ ކުރިއަށް ގެންދިއުމުގެ މަސްލަހަތެއް މިހާރު ނެތް ކަމަށް ބުނެ އެ މައްސަލަ ކުރިއަށް ނުގެންގޮސް ބާތިލް ކުރުމަށް ޕީޖީ އޮފީހުން އެދިފައިވާތީ އެވެ.