ލ ފޮނަދޫ ކައުންސިލްގެ ހުރިހާ މެމްބަރުން ވެރިކަން ކުރާ ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ) އަށް ސޮއިކޮށްފިއެވެ.

ރޭ ރައީސް ޑރ މުޙައްމަދު މުޢިއްޒުގެ ގެކޮޅު މ ދިމްޔާތުގައި ބޭއްވި ރަސްމިއްޔާތެއްގައި ލ ފޮނަދޫ ކައުންސިލްގެ ހުރިހާ މެމްބަރުންނާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ މެމްބަރުންނާއި، ޕީޕީއެމް/ޕީއެންސީގެ ސްޓިއަރިންގ ކޮމިޓީގެ ހުރިހާ މެންބަރުން ވަނީ ޕީއެންސީއަށް ވަނީ ސޮއިކުރައްވައިފައެެވެ.

އެބޭފުޅުން ޕީއެންސީއަށް ސޮއި ކުރުމަށް ބޭއްވި ރަސްމިއްޔާތުގައި މެމްބަރޝިޕް ފޯމުތަކާއި ހަވާލުވެވަޑައިގަތީ ރައީސް ޑރ މުޢިއްޒެވެ.

މިރަސްމިއްޔާތުގައި ފޮނަދޫ އަށް ނިސްބަތްވާ ދައުލަތުގެ ދެ ވަޒީރުން ކަމަށްވާ ފަތުރުވެރިކަމާބެހޭ ވަޒީރު އިބްރާހީމް ފައިޞަލް އާއި މާލީ ވަޒީރު މުޙައްމަދު ޝަފީޤް ވެސް ބައިވެރިވެވަޑައިގެންނެވި އެވެ.

ލ.އަތޮޅު ކައުންސިލްގެ ނައިބު ރައީސް އަދި ފޮނަދޫ ކައުންސިލްގެ ރައީސް އަހްމަދު ރިޔާޟް ވެސް ރޭ ވަނީ ޕީއެންސީއަށް ސޮއިކުރައްވައިފައެވެ.

ޕީއެންސީ އަށް 10،000 މެމްބަރުން އިތުރު ކުރުމުގެ މަސައްކަތް ރައީސް މުއިއްޒުގެ އިރުޝާދުގެ ދަށުން ވަނީ ފަށައިފައެވެ. ރައީސް ޑރ މުޢިއްޒު އިރުޗާދު ދެއްވައިިފައިވަނީ އެ ޕާޓީއާ ކޯލިޝަންގައި އޮތް ޕީޕީއެމް އިން އެއްވެސް މެންބަރަކު ވަކި ނުކޮށް ޕީއެންސީއަށް 10،000 މެމްބަރުން ހަމަކުރުމަށެވެ.