ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ވެރިކަމަކީ ރައްޔިތުންނަށް ލާބަހުރި ނަފާވެރި ވެރިކަމަކަށް ހެދުމަށްޓަކައި ރައީސްގެ ފަހަތްޕުޅުގައި ސާބިތުކަމާއެކު ހުންނަވާނެކަމުގައި ނައިބް ރައީސް ހުސައިން މުޙައްމަދު ލަޠީފް ވިދާޅުވެއްޖެއެވެ. 

ޕީޕީއެމްގެ ލީޑަރޝިޕް އިން އެމަނިކުފާނު ބާކީ ކޮށްލައްވައިފައިވާކަމަށް ބުނެ، ކުރީގެ ރައީސް އަދި ޕީޕީއެމްގެ ރައީސް ޔާމީން ޢަބްދުލް ޤައްޔޫމް އެ ޕާޓީ ދޫކުރައްވައި އައި ސިޔާސީ ޕާޓީއެއް އުފެއްދެވުމުގެ މަސައްކަތް ކުރިއަށްދާ މި ދަނޑިވަޅުގައި ނައިބްރައީސް ހުސެއިން މުޙައްމަދު ލަޠީފް ކުރެއްވި ޓުވީޓެއްގައި ބުނެފައިވަނީ، މި ވެރިކަމަކީ އެ މަނިކުފާނުވެސް ހިމެނި ވަޑައިގަންނަވާހެން، އެތަކެއް ރައްޔިތުންނެއްގެ ބައިވެރިވުމާއި ބުރަ މަސައްކަތުން ގެނެވުނު ވެރިކަމެއް ކަމަށެވެ. 

މީގެ އިތުރުން ނައިބްރައީސް ގެ ޓުވީޓުގައި ވިދާޅުވީ، ރައީސް ޑރ މުއިއްޒު އިސްކުރައްވާނީ ރައްޔިތުންގެ މަސްލަހަތު ކަމަށާއި، ރައްޔިތުންނަށް ލާބަހުރި ނަފާވެރި ވެރިކަމަކަށް ހެދުމަށްޓަކައި ރައީސްގެ ފަހަތްޕުޅުގައި ސާބިތުކަމާއެކު ހުންނަވާނެކަމުގައެވެ. 

ރައީސް ޕީޕީއެމުން ވަކިވެ ވަޑައިގެން އައު ސިޔާސީ ޕާޓީއެއް އުފެއްދެވުމުގެ މަސައްކަތް ބާރު ދުވެލީގައި ކުރަމުން އަންނަ އިރު ސަރުކާރުގައި ތިއްބެވި ޕީޕީއެމަށް ނިސްބަތްވެ ވަޑައިގަންނަވާ މިނިސްޓަރުންނާއި، އެހެނިހެން އިސް ފަރާތްތައް އަންނަނީ ރައީސް މުއިއްޒުގެ ފަހަތްފުޅުގައި ތިއްބެވިކަން އިއުލާނު ކުރައްވަމުންނެވެ. ބެލެވޭ ގޮތުގައި ރައީސް ޔާމީނު އަލަށް އުފައްދަވާ ޕާޓީ ރެޖިސްޓަރ ކުރުމަށް މާދަމާ ހުށަހަޅާނެއެވެ.