މީގެ ކުރިން ދުވަހަކުވެސް ނާންނަހައި އަވަހަށް މޫސުމަށް ބަދަލު އަންނަ ދުނިޔެއެއްގައި، ވަކި ހަމަތަކަކާއި ގަވާއިދުތަކެއްގެ ތެރެއިން ކަންކަން ހަމަޖެހެންދެން އިންތިޒާރުކޮށްގެން ތިބެވެން ނެތްކަމަށް، ރައީސް ޑރ. މުޙަންމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވީ ތިމާވެށީގެ އެންމެ ބޮޑު ސަމިޓް ކަމުގައިވާކޮޕް28 ސަމިޓްގައި ތަގްރީރު ކުރައްވަމުންނެވެ.
ރައީސް ޑރ.މުއިއްޒު ވިދާޅުވީ، މީގެ ކުރީން ދުވަހަކުވެސް ނާންނަހައި އަވަހަށް މޫސުމަށް ބަދަލު އަންނަމުންދާކަމަށެވެ. އެހެންކަމުން ވަކި ހަމަތަކަކާއި ގަވާއިދުތަކެއްގެ ތެރެއިން ކަންކަން ހަމަޖެހެންދެން އިންތިޒާރުކުރެވޭކަށް ނެތްކަމަށާއި، ދުނިޔޭގެ މާލީ ކަންކަން ހިނގާ އުޞޫލާ އޮނިގަނޑަށް ބޮޑު ބަދަލެއް ގެންނަން އެބަ ޖެހޭކަމަށް ރައީސް ވިދާޅުވި އެވެ.
"ފައިސާގެ ޤާބިލްކަމާ ކަންކުރެވޭނެ ޤާބިލްކަން ވަޒަންކޮށްކޮށް ތިބޭކަށް ވަގުތެއް ނެތް،" ރައީސް ވިދާޅުވި އެވެ.
މި ސަމިޓްގައި ވާހަކަ ދައްކަވަމުން ރައީސް ވިދާޅުވީ، މޫސުމަށް އަންނަ ބަދަލުތަކުން ލިބޭ ގެއްލުން ކުޑަކުރުމަށް ފައިސާ ހޯދުމަށް ހުރި އުނދަގޫތައް ލުއިކޮށްދޭން ޖެހޭކަމަށެވެ. އެމަނިކުފާނު ވިދާޅުވީ، ކޮންމެ އަހަރަކުވެސް މިވާހަކަތައް ތަކުރާރުކޮށް ދައްކަވަމުން ގެންދަވާކަމަށާއި، ނަމަވެސް މި އަމާޒު އަދިވެސް ހާސިލްވެފައި ނުވާކަމަށެވެ.
" އަޅުގަނޑުމެން ބޭނުންވަނީ، މޫސުމީ ކަންކަމަށް ސީދާ ހޭދަކުރެވޭނެ މާލިއްޔަތެއް ކަނޑައަޅައިގެން، އެކަމަށް އެކަށީގެންވާ ފިޔަވަޅުތަކެއް އެޅުމަށް އިސްކަންދެވޭނެ އައު ގޮތްތަކެއް،" ރައީސް ވިދާޅުވި އެވެ.
ރައީސް ވިދާޅުވީ، 1.5 ޑިގްރީގައި ދުނިޔޭގެ ފިނިހޫނުމިން ހިފެހެއްޓުމަށްޓަކައި ޕެރިސް އެއްބަސްވުމާ އެއްގޮތަށް ޕްލޭންއެއް ރާވަންޖެހޭ ކަމަށާއި، އަދި މި ޕްލޭން ވާން ޖެހޭނީ، ހަމަހަމަކަން ޤާއިމްވެފައިވާ، އަދި ލިބެން ހުރި އެންމެ ރަނގަޅު ޢިލްމުގެ އަލީގައި ކޮށްފައިވާ ޕްލޭނަކަށް ކަމަށެވެ.
އިތުރަށް ވާހަކަ ދައްކަވަމުން ރައީސް ވިދާޅުވީ، ސަރުކާރުން އަމާޒު ހިފާފައިވަނީ، ރާއްޖެގައި ބޭނުންކުރާ ކަރަންޓުގެ 33 އިންސައްތަ ފުއްދައިދޭނެ އިޢާދަކުރަނިވި ހަކަތައިގެ ނިޒާމު، ކުރިއަށް އޮތް ފަސް އަހަރުގެ ތެރޭގައި ޤާއިމުކުރުމަށް ކަމަށެވެ. ނަމަވެސް މި ވަގުތު އިޢާދަކުރަނިވި ހަކަތަ ބޭނުންކުރެވޭ މިންވަރު ހުރީ 4 އިންސައްތާގައި ކަމަށާއި، މި ލަނޑުދަނޑި ޙާޞިލްކުރުމަށްޓަކައި 600 މިލިއަން ޑޮލަރު އިތުރަށް ހޯދަން ޖެހޭކަމަށް އެމަނިކުފާނު ވަނީ ވިދާޅުވެފަ އެވެ.
މީގެ އިތުރުން އެމަނިކުފާނުވަނީ މޫސުމަށް އަންނަބަދަލުތަކުން ލިބޭ ގެއްލުންތަކުން އަރައިގަތުމަށް އެހީތެރިވާ، 'ލޮސް އެންޑް ޑޭމަޖް ފަންޑު' ގެ ބޭނުން ހިފަން ފަށައިގަތުމަށް، ނިންމި ނިންމުމާމެދު އުފާކުރައްވާކަން ފާހަގަ ކުރައްވާފަ އެވެ.
"ޔޫއޭއިން މިކަމުގައި އިސްނަންގަވައި މަގު ދެއްކެވީތީ، އަދި ޤައުމުތަކުން މިކަމަށް ތާއީދުކުރައްވައި އެއްބާރުލުންދެއްވައި، މި ފަންޑަށް ބޮޑެތި އެހީތަކެއް ވެދެއްވާނެކަމުގެ ޔަޤީންކަން ދެއްވީތީ އަޅުގަނޑު ޝުކުރު ދަންނަވަން،" ރައީސް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
