މުޅި ރާއްޖޭގައި ފަސް މިލިއަން ގަސް އިންދުމުގެ ބިޔަ މަޝްރޫޢެއް ކުރިއަށް ގެންދަވާނޭކަމަށް ރައީސުލް ޖުމްހޫރިއްޔާ ޑރ.މުހަންމަދު މުއިއްޒު ވަޢުދު ވެވަޑައިގަނެފި އެވެ.
ދުބާއީގައި ކުރިއަށްދާ މޫސުމާއި ބެހޭ ކޮންފަރެންސް،ކޮޕް28 ގައި ވާހަކަފުޅު ދައްކަވަމުން ރައީސް ޑރ.މުއިއްޒު ވިދާޅުވީ، ރާއްޖޭގެ ކުދި ޖަޒީރާ ރަށްތަކަކީ، ވިލުންތެރި، ސާފު ފެހި މާޙައުލަކަށް ހެދުމަށް މިސަރުކާރުން ވަރަށް ބޮޑަސް އިސްކަންދެއްވާ ކަމަށެވެ.
ރައީސް ވިދާޅުވީ، ރާއްޖޭގެ ގުދުރަތީ ވެށީގައިވާ ކޮންމެ ދިރުމެއްގައިވެސް އަގެއްވާކަމަށާއި، އެއިން ކޮންމެ އެއްޗަކަށް ލިބޭ ގެއްލުމަކީވެސް ޤައުމަށާއި، މުޅި އިޤްތިޞާދަށްވެސް ލިބޭ ގެއްލުމެއް ކަމަށެވެ.
“އަޅުގަނޑުމެން ދިރިތިބުމަށާ، ދިރިއުޅުން ބިނާކުރުމަށްވެސް، މި ނާޒުކު ތިމާވެށި ރައްކައުތެރިކަމާއެކު ދަމަހައްޓަން ބޭނުންވޭ. އަވަސްއަވަހަށާ ލަސްލަހުންވެސް، މި ނާޒުކު ވެށްޓަށް ލިބެމުންދާ ކޮންމެ ގެއްލުމަކުން އަރައިގަތުމަށްޓަކައި އެހީތެރިކަން ބޭނުންވޭ،"
ރައީސް ވިދާޅުވި އެވެ.
ދުނިޔޭގެ ޤައުމުތަކުގެ ލީޑަރުންނާއި މުހާތަބުކުރައްވާ އިތުރަށް ވާހަކަފުޅު ދައްވަމުން ރައީސް ވިދާޅުވީ، ދުނިޔޭގެ ފަރުދެއްގެ ހައިސިއްޔަތުން، ދުނިޔޭގެ ވެއްޓަށްޓަކައި ކޮންމެ މީހަކުވެސް އުފުލަންޖެހޭ ޒިންމާތަކެއް ވާކަމަށެވެ. އެހެންކަމުން އުޖާލާ މުސްތަގުބަލެއް ބިނާކުރުމަށްޓަކައި އެންމެން ގުޅިގެން މަސައްކަތްކުރުމަށް އެމަނިކުފާނުވަނީ އެދިވަޑައިގަނެފަ އެވެ.
" އަޅުގަނޑުމެން މި ވިސްނާ ވިސްނުންތަކާ، ކުރާ މަސައްކަތުގެ ސަބަބުން، އެދެވޭ ރަނގަޅު ނަތީޖާތަކެއް ނެރެވޭކަން ކަށަވަރުކުރަމުން ދަމާ ހިންގަވާ. އޭރުން އަޅުގަނޑުމެންގެ ޒިންމާތައް ފުރިހަމައަށް އަދާކުރުމަށް މަގުފަހިވަމުން ދާނެ،"
ރައީސް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
