މުޅި ރާއްޖޭގައި ފަސް މިލިއަން ގަސް އިންދުމުގެ ބިޔަ މަޝްރޫޢެއް ކުރިއަށް ގެންދަވާނޭކަމަށް ރައީސުލް ޖުމްހޫރިއްޔާ ޑރ.މުހަންމަދު މުއިއްޒު ވަޢުދު ވެވަޑައިގަނެފި އެވެ.

ދުބާއީގައި ކުރިއަށްދާ މޫސުމާއި ބެހޭ ކޮންފަރެންސް،ކޮޕް28 ގައި ވާހަކަފުޅު ދައްކަވަމުން ރައީސް ޑރ.މުއިއްޒު ވިދާޅުވީ، ރާއްޖޭގެ ކުދި ޖަޒީރާ ރަށްތަކަކީ، ވިލުންތެރި، ސާފު ފެހި މާޙައުލަކަށް ހެދުމަށް މިސަރުކާރުން ވަރަށް ބޮޑަސް އިސްކަންދެއްވާ ކަމަށެވެ.

ރައީސް ވިދާޅުވީ، ރާއްޖޭގެ ގުދުރަތީ ވެށީގައިވާ ކޮންމެ ދިރުމެއްގައިވެސް އަގެއްވާކަމަށާއި، އެއިން ކޮންމެ އެއްޗަކަށް ލިބޭ ގެއްލުމަކީވެސް ޤައުމަށާއި، މުޅި އިޤްތިޞާދަށްވެސް ލިބޭ ގެއްލުމެއް ކަމަށެވެ.

ދުނިޔޭގެ ޤައުމުތަކުގެ ލީޑަރުންނާއި މުހާތަބުކުރައްވާ އިތުރަށް ވާހަކަފުޅު ދައްވަމުން ރައީސް ވިދާޅުވީ، ދުނިޔޭގެ ފަރުދެއްގެ ހައިސިއްޔަތުން، ދުނިޔޭގެ ވެއްޓަށްޓަކައި ކޮންމެ މީހަކުވެސް އުފުލަންޖެހޭ ޒިންމާތަކެއް ވާކަމަށެވެ. އެހެންކަމުން އުޖާލާ މުސްތަގުބަލެއް ބިނާކުރުމަށްޓަކައި އެންމެން ގުޅިގެން މަސައްކަތްކުރުމަށް އެމަނިކުފާނުވަނީ އެދިވަޑައިގަނެފަ އެވެ.