ޗައިނާއަކީ ދިވެހިރާއްޖޭގެ ތަރައްޤީގެ އެންމެ މުހިންމު އެއް ބައިވެރިޔާކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ.

ރައީސް ޑރ. މުއިއްޒު މިފަދައިން ވިދާޅުވެފައި ވަނީ، ކޮޕް28 ކޮންފަރެންސްގައި ޗައިނާއިން ބައިވެރިވި މަތީ ފެންވަރުގެ ވަފުދުގެ އިސްވެރިޔާ، ޗައިނާގެ ވައިސް ޕްރިމިއަރ ޑިންގް ޝުއެޝިއެންގް އާއި ބައްދަލުކުރައްވާ ދެއްކެވި ވާހަކަ ފުޅުގައެވެ.

ދުބާއީގައި މިހާރު ކުރިއަށްދާ މި ކޮންފަރެންސްގެ ހަވާސާގައި ބޭއްވި މި ބައްދަލުކުރެއްވުމުގައި ރައީސް ވަނީ، ރާއްޖެއާއި ޗައިނާއާ ދެމެދުގައިވާ ގުޅުން އިތުރަށް ބަދަހިކުރުމަށް ބޭނުންވެވަޑައިގަންނަވާ ކަމުގައި ވިދާޅުވެފައެވެ.

Advertisement

ރައީސް ވިދާޅުވީ، ރާއްޖޭގެ ތަރައްޤީއާއި ކުރިއެރުމަށް ޗައިނާއިން ވަމުންގެންދާ އެހީތެރިކަން ކުރިއަށް އޮތްތަނުގައި އިތުރު ވެގެންދާނެކަމަށް އުންމީދުކުރައްވާކަމަށެވެ.

މިބައްދަލުކުރެއްވުމުގައި ޗައިނާގެ ވައިސް ޕްރިމިއަރ ވަނީ، ރިޔާސީ އައު ދައުރު ފެއްޓެވުމުގެ މުނާސަބަތުގައި ރައީސް ޑރ، މުއިއްޒަށް މަރްޙަބާ ދަންނަވާފައެވެ. އަދި އެޤައުމުން ރާއްޖެއާއިއެކު އަބަދުވެސް ބަދަހި ގުޅުމެއް ބާއްވާނެކަމަށާއި، ރާއްޖޭގެ ތަރައްގީއަށް އެގައުމުން ދެމުންއަންނަ އެހީތެރިކަން ދަމަހައްޓާނެކަމަށްވެސް އޭނާ ވިދާޅުވިއެވެ.