ދިވެހިބަސް ނޫން ބަހަކުން ވިސްނާ ދިވެހިންގެ ބޮޑު އާބާދީއެއް އުފެދިގެންދާކަމީ، ޤައުމީ ބޮޑު މައްސަލައެއްކަމަށް ދިވެހިބަހާއި ސަޤާފަތާއި ތަރިކައާ ބެހޭ ވުޒާރާގެ ވަޒީރު، އާދަމް ނަސީރު އިބްރާހީމް ވިދާޅުވެއްޖެއެވެ.
ހޮނިހިރު ދުވަހުގެ ރޭ ސަންގު ޓީވީން ގެނެސްދިން "ސިޔާސަތު" ޕްރޮގްރާމުގައި ވާހަކަ ދައްކަވަމުން މިނިސްޓަރ ނަސީރު ވިދާޅުވީ، އަމިއްލަ މާދަރީ ބަސް ނޫން އެހެން ބަހަކުން ވިސްނަމުންދާ އާބާދީއެއް ބޮޑުވެގެން ދިއުމަކީ ރައްކާތެރިކަމެއް ނޫންކަމަށެވެ.
ޤައުމެއް ކުރިއަރާ ދިއުމަށް އެންމެ މުހިންމު އެއްކަމަކީ އެބައެއްގެ އަމިއްލަ ބަހުން ވިސްނުމުގެ ޤާބިލްކަން އެބައެއްގެ ކިބައިގައި އުފެއްދުންކަމަށާއި، އެއީ ދުނިޔޭގެ ކުރިއަރާފައިވާ އެހެން ޤައުމުތަކުގައިވެސް އެކަން ހިނގަމުން އަންނަ އުސޫލުކަމަށް މިނިސްޓަރ ވިދާޅުވި އެވެ.
އިތުރަށް ވާހަކަ ދައްކަވަމުން މިނިސްޓަރ ވިދާޅުވީ، ދިވެހި މާއްދާއިން ފާސްވާ ދަރިވަރުންގެ އަދަދަށް އަންނަމުންދާ ބަދަލުތަކަށް ހައްލެއް ހޯދުމަށްޓަކައި، އިލްމީގޮތުން ކަންކަން ދިރާސާކޮށް ބެލުމަށްފަހު އެއިން ފެންނަ ނަތީޖާގެ މައްޗަށް ކަންކަން ކުރިއަށް ގެންދިޔުން މުހިންމުކަމަށެވެ.
" ރައީސް ޑރ. މުހައްމަދު މުއިއްޒުގެ އެންމެ ފުރަތަމަ ތަގުރީރުގައި ވަރަށް ސާފުކޮށް ވިދާޅުވެފައި އޮންނާނެ އިލްމީ ގޮތުން ކަންކަން ދިރާސާކޮށް ބެލުމަށް ފަހު އޭގެއިން ފެންނަ ނަތީޖާގެ މައްޗަށް ކަންކަން އަޅުއްވަމުން ގެންދަވާނެ ވާހަކަ،"
މިނިސްޓަރު ނަސީރު
މިނިސްޓަރ ވިދާޅުވީ، ހުރިހާ ރައްޔިތުންވެސް ދިވެހިންނާއި ގުޅިފައިވާ އަމިއްލަ ވަންތަ ސިފަތައްހޯދާ، ދިވެހިންނަށް ގެއްލިގެން ގޮސްފައިވާ ތަރިކަ އަލުން އަނބުރާ ހޯދުމަށް މަސައްކަތްކުރުމަށް އެދިވަޑައިގަންވާ ކަމަށެވެ.
Advertisement
This content is created and paid for by advertisers and does not involve Voice Journalists
