ދިވެހިރާއްޖޭގައި ތިބި އިންޑިއާގެ ސިފައިން، މިގައުމުން ވަރަށް އަވަހަށް ބޭލޭނެ ކަމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ. 

ތުރުކީވިލާތަށާއި، ކޮޕް 28 ސަމިޓަށް ޔޫއޭއީ އަށް ކުރެއްވި ދަތުރުފުޅުގެ ތަފްސީލް ހާމަކުރައްވުމަށް މިއަދު ބޭއްވެ ނޫސްވެރިންގެ ބައްދަލުވުމުގައި ރައީސް މުޢިއްޒު ވަނީ އެ ދެ ގައުމަށް ކުރެއްވުނު ދަތުރުފުޅުގެ ތެރެއިން ކުރެވުނު މަޝްވަރާ ތަކާއި، ލިބުނު ކުރިއެރުންތަކަށް އަލި އަޅުވާލައްވާފައެވެ. 

އެވާހަކަ ތަކުގެ ތެރެއިން ރައީސް މުޢިއްޒު ވަނީ ވަކިން ޚާއްސަކޮށް އިންޑިޔާގެ ބޮޑުވަޒީރާއި އެކު ބޭއްވުނު ބައްދަލުވުމުގެ ތެރެއިން ރާއްޖެއާއި އިންޑިއާއާއި ދެޤައުމުގެ މަތީ ފަންތީގެ ކޮމެޓީއެއް އެކުލަވާލަން ނިންމެވި ނިންމުމަށް އަލިއަޅުވާލައްވާފައެވެ. 

އެ ކޮމިޓީ އުފައްދަވާކަން ސަރުކާރުން އިއުލާން ކުރުމާއި އެކު ސަރުކާރަށް ފާޑުކިޔުންތައް ވަނީ އަމާޒުވެފައެވެ. އެގޮތުން، ރައީސް މުޢިއްޒާއި މޯދީއާއި ދެމެދު ބޭއްވުނު ބައްދަލުވުމުގައި އިންޑިޔާ ސިފައިން ރާއްޖެއިން ބޭލުމުގެ ވާހަކަ ނުދެކެވޭ ކަމަށާ، އަދި އެފަދަ ކޮމިޓީއެއް އުފައްދުމަށް ސަރުކާރުން ނިންމި ސަބަބާއިމެދުވެސް ވަނީ ސުވާލު އުފައްދާފައެވެ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަނީ--ފޮޓޯ/ރައީސް އޮފީސް 

އެކަމާއި ގުޅިގެން ވާހަކަ ދައްކަވަމުން ރައީސް މުޢިއްޒު ވިދާޅުވީ، އެމަނިކުފާނު ރިޔާސީ އިންތިހާބުގެ ކެންޕެއިން ތެރެއިންނާއި، ރައީސުލްޖުމްހޫރިއްޔާ ކަމަށް އިންތިޚާބުވެވަޑައިގެންނެވުމަށްފަހު ގަޔާއި، ހުވާ ކުރެއްވި ރަސްމިއްޔާތުގައިވެސް ދެއްކެވި އެންމެ މުހިންމު ވާހަކަ އަކީ ދިވެހިރާއްޖޭގެ މިނިވަންކަމާއި އިސްތިގުލާލުގެ ވާހަކަ ކަމަށެވެ.

އަދި ދިވެހިންގެ މިނިވަންކަމާއި އިސްތިގުލާލަށް ބުރޫ އަރާނެ ފަދަ ކަމެއް ނުކުރާ ކަމުގައިވާ ނަމަ ކޮންމެ ގައުމަކާއި އެކުވެސް ގުޅުން ބަދަހި ކުރައްވާނެ ކަމަށާ، ނަމަވެސް މިނިވަންކަމާއި ސިޔާދަތުގެ ރަތް ރޮނގު ފަހަނައަޅާދާ ނަމަ، ގުޅުން ނުބޭއްވޭނެ ކަމަށް އެމަނިކުފާނު އޭރުވެސް މިހާރުވެސް ވިދާޅުވަމުންދާކަން ރައީސް ވަނީ ހަނދުމަކޮށްދެއްވާފައެވެ. 

އެގޮތުން ރާއްޖޭގައި ތިބި އިންޑިއާ ސިފައިން ބޭލުމުގެ މަސައްކަތްވެސް ކުރައްވާނެ ކަމަށާ، އެކަން ކުރައްވާނީ ޑިޕްލޮމެސީގެ ރިވެތި އުސޫލު ތަކުގެ ތެރެއިން ކަމަށް ރައީސް މުޢިއްޒު ވިދާޅުވި އެވެ. 

ރައީސް މުޢިއްޒު ވިދާޅުވީ ވެރިކަމަށް ހުވާ ކުރެއްވި ދުވަހާއި ޖެހިގެން އައި ދުވަހު، ރާއްޖޭގައި ތިބި އިންޑިއާ ސިފައިން ގެމްދިޔުމަށް އިންޑިއާ އިސް ވެރިންގެ އަރިހުގައި ރަސްމީކޮށް އެދިލައްވާފައި ވާނެ ކަމަށެވެ.

އަދި ހުވާ ކުރެއްވުމަށްފަހު، މިއަދާއި ހަމައަށް އެކަމާއި ގުޅޭ 4 ވަރަކަށް ބައްދަލުވުން، އިންޑިއާގެ އިސްފަރާތްތަކާއި އެކު ކުރިއަށް ގެންދެވިފައިވާނެ ކަމަށާ، އިންޑިއާ ސިފައިން ރާއްޖެއިން ގެންދާނެ ކަމަށް އެ ގައުމުން ބުނެފައިވާ ކަމަށް އެމަނިކުފާނު ވިދާޅުވި އެވެ. 

ރައީސުލްޖުމްހޫރިއްޔާ ޑރ މުހައްމަދު މުޢިއްޒު މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަނީ--ފޮޓޯ/ރައީސް އޮފީސް 

މިއާއެކު ރައީސް މުޢިއްޒު ވިދާޅުވީ، ރާއްޖޭގެ މިނިވަންކަމާއި ސިޔާދަތު ރައްކާކުރަން ސަރުކާރުންނާއި ދިވެހިންވެސް ނިންމި ނިންމުމަށް މިސަރަހައްދުގެ ހުރިހާ ގައުމުތަކުންވެސް އިހްތިރާމް ކުރައްވާނެ ކަމަށް ގަބޫލު ކުރައްވާ ކަމަށެވެ. އަދި އެފަދައިން އިންޑިޔާއިން ބުނެފައިވާ ކަމަށްވެސް އެމަނިކުފާނު ވިދާޅުވި އެވެ. 

ރައީސް ވިދާޅުވީ، އިންޑިއާ އާއި އެކު އުފެދުނު ހައިލެވެލް ކޮމިޓީގެ މަސައްކަތުގެ ތެރެއިން، ބްރިޖު މަޝްރޫއު ފަދަ މަޝްރޫއުގެ ކަންކަން ބަލައި، ލަސްވާ ސަބަބުތައް ދެނެގަނެ، އަވަސް ކުރެވެން ހުރި ނަމަ އެކަންވެސް ކުރެވިގެންދާނެ ކަމަށެވެ.